Амма улууһугар Абаҕаҕа «Үөрэх» национальнай бырайыак иитинэн 150/75 миэстэлээх оскуола-уһуйаан тутуллар. Уопсайа 4 729 кв.м. иэннээх тутуу кэлэр сылга үлэҕэ киириэхтээх.
Аммаҕа тутулла турар биир мэндиэмэннээх уһуйаан уонна икки мэндиэмэннээх оскуола уопсай көрүдүөрүнэн уонна пищеблогунан силбэниэхтэрэ. Тутууга «Электромонтаж» ХЭУо үлэлиир.
—-Билиҥҥи туруган эбийиэк 25 бырыһыан бэлэм. Үлэ тиһиктээхтик салҕанар. Эбийиэги тутууга 17 киһи үлэлиир. Тутар-монтажтыыр үлэлэр кыраапыгынан бара тураллар, — диэн иһитиннэрэр СӨ судаарыстыбаннай сакаас сулууспатын генеральнай дириэктэрин бастакы солбуйааччы Гаврил Скрыбыкин.
Саҥа оскуолаҕа алын сүһүөх кылаас оҕолоругар түөрт хос баар буолара былааннанар. Манна уолаттарга мастарыскыай, кыргыттарга үлэ уруогар аналлаах хостор киириэхтэрэ. Маны таһынан, оскуолаҕа медицинскэй блок, успуорт саалата, аактабай саала, 80 миэстэлээх остолобуой, логопед хоһо, учууталлар хосторо былааннаналлар.
Орто сүһүөх уонна үрдүкү кылаас үөрэнээччилэригэр 13 кылаас баар буолар. Итинтэн үс хос лабораториялардаах, икки лингафоннай кылаас, информатика кабинета, ааҕар саалалаах бибилэтиэкэ, кыһыҥҥы сад, уо.д.а. киирэллэр.
Уһуйааҥҥа 1 сааһыттан 7-гэр диэри саастаах оҕолорго анаан түөрт бөлөх аһыллар. Манна физкултууралыырга, ырыа үөрэтэллэригэр анал саалаланар, күүлэйдиир верандаланар, сэбиэдиссэй, логопед, медүлэһит хосторо баар буолаллар диэн СӨ Тутуу министиэристибэтин пресс-сулууспата иһитиннэрэр.