Аатырбыт Примадонна сүгүрүйээччилэрэ кэтэспит-манаспыт күннэрэ-дьыллара кэмниэ-кэнэҕэс, дьэ, үүннэ. Кырасаабысса төрөөбүт күнүнэн анаан тэрийэр кэнсиэрин туһунан бу кыһыҥҥыттан сэһэн-сэппэн тоҕо тардыллан, сири-сибиири тилийэ көппүтэ. Биһиги холбутугар бэйэтэ да чэпчэкитэ суох билиэти, омуннаабыттара дуу, омуннаабатахтара дуу, бэл, хас эмэ бүк үрдэтэн атыылааччылар туора-маары дэлэйбиттэр үһү диэн сурах-садьык киэҥник тарҕаммыта.
Дьэ, итинник кэтэһиин-кэтэһэн, Примадоннабыт 70 сааһынан тэрийэр суон сураҕырбыт кэнсиэрэ бэҕэһээ Кириэмил Судаарыстыбаннай дыбарыаһыгар буолла. Үтүмэн киһи сүрэҕин-быарын долгуппут улахыын-улахан кэнсиэргэ Саха сирин дьоно-сэргэтэ кытары анаан-минээн тиийэн сырытта. Олортон биирдэстэрэ, Саха сиригэр биллэр-көстөр шоумен Клим Федоров. Кини сөбүлүүр ырыаһытын кэнсиэригэр сылдьаары, төрөөбүт күнүгэр бэйэтигэр бэйэтэ бэлэх оҥостубутун төлөпүөнүнэн эттэ.
— Алла Пугачева кэнсиэригэр Кириэмил дыбарыаһыгар сырыттыбыт, — диир кини кэнсиэртэн тахсаат, — Мин бу кэнсиэргэ сылдьыбыппыттан наһаа үөрэбин. Инстаграмҥа Алла Пугачева кэнсиэрин биллэриитин таһааран баран, бу кэнсиэргэ сылдьыахпын баҕарабын диэн суруйбутум. Утаакы буолбакка, Moscow Show билиэт атыылыыр ааҕыныстыбаттан миэхэ биир кыыс сибээскэ тахсан: «Билиэт ылаҕыт дуо? «, — диэн улаханнык долгуппута. Мин оччону истээт, тута Алла Пугачева фанаттара диэн бөлөх тэрийбитим уонна билиэт үлэспитим. Маҕан футболка ылан, Примадонна мэтириэтин оҥотторбуппут.
Билиэтим 11 эрээт, 50-с миэстэ. Мин кэннибэр эстрада сулустара Светлана Лобода, Дима Билан, Арассыыйа медиаменеджерэ, МУЗ-ТВ ханаал генеральнай дириэктэрэ Арман Давлетяров, дьон-сэргэ сүрэҕин-быарын туппут уһулуччу ырыаһыт Надежда Бабкина олордулар. Өссө Арассыыйа, аан дойду таһымнаах улахан ырыаһыттары, шоу-бизнескэ биллэр-көстөр дьону-сэргэни тутан олорон уу харахпынан көрдүм. Николай Басковы, Филипп Киркоровы, Валерий Леонтьевы, Владимир Винокуру, Игорь Крутойу, Анастасия Волочкованы, Игорь Николаевы, Валентин Юдашкины, медиаменеджер Константин Эрнсты, Николай Цискаридзены, Юрий Николаевы, о.д.а.
Кэнсиэр уһулуччу үчүгэй! Алла Пугачева эт куолаһынан, тыыннаах доҕуһуолунан ырыа бөҕөтүн соҕотоҕун ыллаата, кэпсээтэ. Кэнсиэр устатыгар таҥаһын үстэ уларытта. 7000 киһи киирэр саалата тобус-толору. Ытыс тыаһа тохтоло суох өрө хабыллан олордо.
Биһиги, Саха сириттэн тиийбит фанаттар, Алла Пугачева мэтириэттээх футболкабытынан болҕомтону улаханнык тартыбыт. Элбэх киһи: «Хантан сылдьаҕыт? » диэн ыйытта, хайҕаата. Хаартыскаҕа түстүлэр, «Москва 24» ханаал анаан кэлэн уһулла, — диэн кэпсээтэ. Кэнсиэргэ киириэхтэрин иннинэ билиэт атыылааччылары көрбөтөҕүн, оттон атыылаһаары көрдөөччү хара баһаамын бэлиэтээтэ.
PS: Манна даҕатан эттэххэ, Алла Пугачева өссө 10 сыллааҕыта сценаҕа тахсарын аны тохтоторун туһунан этэн, улахан долгуйууну таһаара сылдьыбыттаах. «Хайдах кинитэ суох буолабыт?» диэн мунаарбыт истээччилэр, онуоха, элбэх этилэр. Арай, Примадонна уопсай кэнсиэртэргэ кыттан сүгүрүйээччилэрин уоскутара. Оттон бэҕэһээҥҥи «Алла Пугачева. P. S.» диэн шоу, сабаҕалаатахха, көрсөргө өссө да эрэннэрэр курдук.
Сардаана БАСНАЕВА, «Саха сирэ» хаһыат, edersaas.ru
Клим Федоров хаартыскалара