Аатырбыт «Александринка» испэктээкилин көрдөрүөҕэ

Бөлөххө киир:

Арассыыйа национальнай тыйаатырдарын кэнгириэстэрин чэрчитинэн,  Санкт-Петербурдааҕы Александринскай национальнай драматическай тыйаатыр Дьокуускайга кэлэн, бэс ыйын 24,25 күннэригэр киэһэ 7 чаастан Саха тыйаатырын сыанатын катокка кубулутан, Н.Гоголь “Женитьба” испэктээкилин көрдөрүөҕэ. Режиссер – РФ норуодунай артыыһа Валерий Фокин. Бу испэктээкил — “Кыһыл көмүс мааска” бириэмийэ лауреата.

“Женитьба” испэктээкил Александринскай тыйаатыр сыанатыгар өссө 1842 сыллаахха, ол эбэтэр, 180 сыллааҕыта турбут эбит. Бу кэмтэн испэктээкил Александринскай тыйаатыр афишатыттан түспэтэҕэ.

Оттон Валерий Фокин бу испэктээкили аан бастаан 2008 сыллаахха туруорбута. Сыананы каток оҥорон, артыыстары хаҥкыга туруортаан, классиканы уларытан, көрөөччүлэри сөхтөрбүтэ.

Атыыһыт кыыһа Агафья Купердягинаҕа алта киһи кэргэн кэпсэтэ кэлэр. Дьоруойдар араас көрдөөх балаһыанньаҕа түбэһэллэрэ, эмиэ да күлүүлээх, эмиэ да курус. Бу пьеса билигин да биһиги олохпутун тыктаран көрдөрөрө саарбаҕа суох.

«Женитьба» испэктээкили тыйаатыр эрэллээх көрөөччүлэрэ уруккуттан  таптыыллар. Атын куораттарга элбэхтик гостуруолларга да сылдьыбыттара, оттон Дьокуускайга аан бастаан көстөр.

Билиэт сыаната 1500 солкуобайтан саҕаланар, Саха тыйаатырын каассатыттан атыылаһыахха сөп. 14-22 саастаах ыччат “Пушкин каартатынан” төлөөн, испэктээкили босхо көрүөн сөп. Испэктээкил уһуна – 2,5 чаас, биир антрактаах.

Аатырбыт “Александринка” – Арассыыйа биир саамай кырдьаҕас тыйаатыра буолар, Петр I кыыһа императрица Елизавета ыйааҕынан, 1756 сыллаахха Александр Невскэй күнүгэр тэриллибитэ. Онон бу тыйаатыр олохтоммут күнэ – атырдьах ыйын 30 күнэ Нуучча идэтийбит тыйаатырын күнүнэн ааттаммыта.

Онон бу сэдэх көстүүнү – аан дойдуга аатырбыт тыйаатыр артыыстарын оонньууларын кэлэн көрүҥ, сэргээҥ.

Ангелина Васильева, “Саха сирэ” хаһыат, edersaas.ru

Хаартыска: alexandrinsky.ru.

+1
0
+1
0
+1
0
+1
0
+1
0
+1
0
+1
0