Саха дьахтара барахсан былыр-былыргыттан уус тарбахтааҕынан биллэр. Аар тайҕабыт маанылаах кыылларын тириитинэн итии таҥас эгэлгэтин тигэн, эр хоһууннарын булка-алка, ыраах айаҥҥа, сыраны-сылбаны эрэйэр ыарахан үлэҕэ-хамнаска тэрийэн сырытыннардаҕа эбээт! Өбүгэлэрбит ол үтүө үгэстэрэ билигин өссө сайдан, киэҥ далааһыннанан, аан дойдуга биллибитэ киһини астыннарбат буолуон сатаммат.
Биһиги бөһүөлэкпитигэр Мэҥэ Хаҥалас Хочотугар уран тарбахтаахтар түмсүүлэрэ тэриллэн үлэлээбитэ уонча сыл буолла. Салайааччынан педагогическай үлэ бэтэрээнэ, СӨ үөрэҕириитин туйгуна Февралина Николаевна Луковцева үлэлиир. Түмсүү ааттыын эриэккэс — «Оһуор түһүлгэтэ» диэн. Манна түөрт хайысханан (кыбытыктаах тигии, сиэлинэн өрүү, туоһунан тигии, сахалыы сону тигии) 20-чэ кэрэ аҥаар дьарыктанар.
Мин бүгүн кэпсиир киһим — бары өттүнэн дэгиттэр талааннаах иистэнньэҥ Светлана Николаевна Корнилова. Кини аата этэрин курдук, сырдык киһи, бэртээхэй хаһаайка, күн-күбэй ийэ, эйэҕэс эбээ. Светлана Николаевна уус тарбахтаах бастыҥа: таҥаһынан, тириинэн, сиэлинэн, хоруоҥканан, быысапканан, туоһунан — саха сатыырынан барытынан дьарыктанар. Дьиэ кэргэнинэн бары сахалыы таҥас таҥнаннар, нэһилиэк, улуус ыһыахтарыгар, култуура уонна успуорт эстэпиэтэтигэр кытталлар, бириистээх миэстэҕэ тиксэллэр.
Иискэ, уран оҥоһукка умсулҕанын кыыһыгар Лидия Петровнаҕа, сиэнигэр Лидианаҕа иҥэрэн, үс көлүөнэ иистэнньэҥ буоланнар, култуура уонна успуорт эстэпиэтэтин быыстапкатыгар мэлдьи кытталлар, лауреат, дипломант буолаллар.
Светлана Николаевна бэйэтин сатабылын атыттары кытта дэлэгэйдик үллэстэр: «Оһуор түһүлгэтин» иһинэн маастар-кылаастары ыытар. Кини тикпит сахалыы таҥастара, унтуулара, сиэлинэн өрбүт көбүөрдэрэ, олбохторо, туоһунан тикпит иһиттэрэ, хоруоҥканан аспыт киэргэллэрэ киэҥ сэҥээриини ылаллар. Кини ситиһиллибитинэн уоскуйбат: күннэтэ бэйэтин билиитин байытар, иис , уран оҥоһук саҥаттан саҥа кистэлэҥнэрин арыйар, дьүөгэлэрин кытта үллэстэр.
Түмүкпэр Светлана Николаевнаҕа өссө айымньылаахтык үлэлииригэр, утуму салҕааччылара өссө элбииллэригэр, кэккэлэрэ хаҥыырыгар баҕарабын!
Елена Прокопьева,уопсастыбаннай кэрэспэдьиэн
Хаартыскалары: Е.Прокопьева ыытта