Ааттаах үчүгэй күрэхтэһии «Булчуттар күннэригэр» Алдаҥҥа Кутана бөһүөлэгэр буолбут. Бу туһунан Алдантан айылҕа харыстабылын кэмитиэтэ иһитиннэрбит.
Күрэхтэһиини физкултуура учууталлара, аҕалар түмсүүлэрэ, дьахталлар кэмитиэттэрэ, култуура дьиэтэ, айылҕа харыстабылын кэмитиэтэ тэрийбиттэр. Барыта 230 киһи сылдьыбыт, 111 киһи тэрээһиҥҥэ кыттыбыт, 50 киһи күрэхтэспит.
Күөн күрэскэ оскуола үөрэнээччилэрэ, 18-35-гэр диэри саастаах ыччаттар, 36-50-гар диэри саастаах дьон диэн бөлөхтөрүнэн арахсан, кустук курдук куоһанан, ох курдук оҥостон кэлэн илин-кэлин түһүспүттэр. Бастакы бөлөх спортсменнара 100 м. тоҥуу хаарынан тирэх мастаах сүүрбүттэр, 100 м. туут хайыһарынан элээрбиттэр, мэһэйдэрдээх сирдэринэн сүүрэн иһэн сыал ыппыттар, таһаҕас сүгэн баран сырсыбыттар, о.д.а. күрэхтэспиттэр. Иккис уонна үһүс бөлөхтөр хамаандалара эмиэ итинник күрэхтэһиилэри сэргэ, кыраҕы харахтаахтар сыал ытыытыгар илин-кэлин түһүспүттэр. Аны туран, быйылгы күрэхтэһиигэ аан бастакытын эбэҥки футболун киллэрбиттэрэ улахан сэргэхсийиини таһаарбыт, күрэхтэһиини өссө сытыырхаппыт. Манна алталыы киһилээх 12 хамаанда күөн көрсүбүт.
Бу күн түһүлгэҕэ мустубут бары дьоҥҥо анаан снайпердар куонкурустара, буранынан сырсыы, канат тардыһыыта, тоҥуу хаарынан сүүрүү, эбэҥкилии сумо, о.д.а. күрэстэр, куонкурустар ыытылланнар, көр-нар көҕүлүттэн тутуллубут. Ырыа, үҥкүү бырааһынньык силигин ситэрэн-хоторон биэрбит. Дьахталлар кэмитиэттэрин тэрийиитинэн, сылаас ас-үөл хоточчу тардыллыбыт.
Түмүккэ тэрээһин кыттыылаахтарыгар дохсун ытыс тыаһынан арыаллатан грамоталар, мэтээллэр, бириистэр туттарыллыбыттар. Дьон-сэргэ тэрээһинтэн улаханнык астынан, эһиилгигэ өссө турунан, эрдэттэн бэлэмнэнэн кыттар баҕалаах тарҕаспыттар.
СӨ Айылҕа харыстабылын министиэристибэтин пресс-сулууспата бэлиэтээбитинэн, маннык тэрээһиннэр улуустарга сыллата сайдан, кэҥээн иһэллэр.
edersaas.ru
Хаартыскалар: Айылҕа харыстабылын кэмитиэтэ (Алдан)