Ааспыт сууккаҕа 28 киһи балыыһаҕа киирдэ

Балыыһаҕа киирэн эмтэнэр дьон ахсаана намтаан, ыалдьыбыт дьон 1%-гар тэҥнэстэ. Үгүстэр дьиэлэригэр сытан, коронавирустан эмтэнэллэр. Ол туһунан атырдьах ыйын 17 күнүгэр суһал ыстаап салайааччытын солбуйааччы Ольга Балабкина брифиҥҥэ кэпсээтэ.

—Балыыһаҕа киирэн эмтэнээччилэр – сүрүннээн аҕам саастаах дьон. Оттон ыараханнык ыалдьан, ИВЛ-га сытааччылар истэригэр быһыыны ылбатах дьон бааллар, — диэн Ольга Балабкина эттэ.

“Роспотребнадзор” управлениета иһитиннэрбитинэн, ааспыт сууккаҕа 28 киһи балыыһаҕа киирбит, ол эбэтэр ааспыт суукка иһигэр ыалдьыбыт дьон 6,6%-на. Кинилэртэн 75,1%-ра Дьокуускай куоракка ыалдьыбыт.

Бүгүҥҥү күҥҥэ ковиды утары быһыы бастакы укуолун 651 976 киһи ылбыт (улахан дьон 90,9%-на). Ревакцинацияны 174 604 киһи ылбыт.

Ааспыт сууккаҕа лабораторияларга 3597 анаалыс оҥоһуллубут. Пандемия саҕаланыаҕыттан барыта 2 456 783 анаалыс оҥоһуллубут.

Билигин балыыһаларга ковидтаах ыарыһахтарга анаммыт 370 куойкаттан  24,9%-на кураанах турар. Балыыһалар эминэн-томунан толору хааччыллан олороллор.

—Быраас балыыһаҕа киирэргэ анаабытын кэнниттэн, туох эмэ биричиинэнэн уочарат, харгыс үөскээтэҕинэ, тута доруобуйа харыстабылын министиэристибэтин «итии» лиинийэтигэр эрийиҥ. Боппуруос түргэнник быһаарыллыаҕа, — диэн Ольга Балабкина сүбэлиир.

Ангелина Васильева, “Саха сирэ” хаһыат”, edersaas.ru

Хаартыска: sakhagov.ru