Ааспыт сылга Орто Халымаҕа успуорт комплекса, биэссэр-акушер пууна үлэҕэ киллэриллибиттэрэ
Орто Халымаҕа 2021 сылга элбэх хайысхалаах успуорт комплекса уонна биэссэр-акушер пууна үлэҕэ киирбиттэрэ.
СӨ Бырабыыталыстыбатын ааспыт сыллааҕы үлэтин отчуота Орто Халыма улууһугар онлайн киэбинэн ыытылынна. Кэпсэтии нэһилиэнньэни кытары харгыһа, мэһэйэ суох ыытылларыгар нэһилиэктэр дьаһалталарын баазаларыгар усулуобуйалар тэриллибиттэр. Ааспыт сылга ыытыллыбыт үлэ-хамнас туһунан СӨ Арктиканы сайыннарыыга уонна хотугу норуоттар дьыалаларыгар миниистир Владимир Черноградскай билиһиннэрдэ. Бу туһунан «Колымские волны» хаһыат суруйда.
Бастатан туран, оройуон олохтоохторо социальнай суолталаах эбийиэктэр тутуллубуттарыттан үөрэллэрин биллэрдилэр. Оройуон баһылыга Евгений Слепцов ааспыт сылга Орто Халыма куоратыгар элбэх хайысхалаах успуорт комплекса, Өлөөкө Күөлгэ биэссэр-акушер пууна тутуллан киирбиттэрин эттэ. Маны сэргэ, Березовканы үрдүк сиргэ көһөрүү үлэтэ салҕанар. Онтон олохтоохтор Дьокуускай куоракка диэри субсидиялаах авиабилиэттэр атыыланалларыттан улаханнык үөрэллэрин биллэрдилэр.
—-Нэһилиэк баһылыктара, уопсастыбаннас бэрэстэбиитэллэрэ сүрүннээн оскуолалары тутуу, хаачыстыбалаах интэриниэт сибээс туһунан ыйыттылар. Манна ордук дьону хаарбах дьиэттэн саҥаҕа көһөрүү бырагырааматынан элбэх кыбартыыралаах дьиэни тутуу боппуруоһа сытыытык турар. Чугастааҕы кэмҥэ үлэ түмүгүнэн барыта боротокуолланан СӨ Бырабыыталыстыбатын көрүүтүгэр тиэрдиллэр. Орто Халыма нэһилиэнньэтэ биэрбит ыйытыыларыгар СӨ Бырабыыталыстыбатын чилиэннэрэ көмөнү, өйөбүлү оҥороллоругар эрэнэллэрин биллэрдилэр, — диэтэ Евгений Слепцов.
+1
+1
+1
+1
+1
+1
+1