Бүгүҥҥүттэн СӨ ситэриилээх былааһын ааспыт сыллааҕы үлэтин отчуота саҕаланна.
2021 сылга уопсайа 126,4 МВт кыамталаах 18 хочуолунай тутуллан уонна саҥардыллан үлэҕэ киллэриллибит. Сылааһынан хааччыйыы кииннэммит ситимнэригэр 1 207 дьиэ холбоммут. Ол иһигэр Уус Алдан улууһугар – 177, Амма улууһугар – 155, Таатта улууһугар – 106.
“Олорор дьиэ уонна куорат эйгэтэ” эрэгийиэн бырайыагын “Ыраас уу” бырайыагын чэрчитинэн 2 эбийиэк үлэҕэ киирбит: Өлүөхүмэ куоракка уунан хааччыйыы ситимэ (1 түһүмэҕэ) уонна Покровскай куоракка ууну ыраастыыр тутуу.
“2019-2024 сылларга Бүлүү бөлөх улуустарын уунан хааччыйыы ситимин сайыннарыы” бырагырааманан Ньурба улууһун Күндээдэтигэр, Сунтаар улууһун Кириэстээҕэр, Элгээйитигэр ууну баһар тиэхиньикэ атыылаһыллыбыт. Үөһээ Бүлүү улууһун Хоротугар, Харыйалааҕар, Хомустааҕар, Сунтаар улууһун Элгээйитигэр ууну хаһаанар тутууну тутуу хаачыйыллыбыт уонна да атын эбийиэктэр үлэҕэ киирбиттэр.
Үүммүт сылга Үөһээ Бүлүү сэлиэнньэтигэр уонна Жатай бөһүөлэгэр канализацияны ыраастыыр 2 тутууну тутуу соруга турар. Маны таһынан уунан хааччыйыы 5 эбийиэгин үлэҕэ киллэриллиэхтээх.