Ааспыт сууккаҕа өрөспүүбүлүкэ үрдүнэн 169 киһи коронавирус дьаҥынан ыалдьыбыт

СӨ Бырабыыталыстыбатын Бэрэссэдээтэлин солбуйааччы  Ольга Балабкина  иһитиннэрбитинэн,  ааспыт сууккаҕа Саха сирин үрдүнэн коронавирус дьаҥынан 169 киһи ыалдьыбыт. Мантан Дьокуускайга 100, Сунтаарга 6, Мэҥэ Хаҥаласка, Ньурбаҕа 5-тии,  Алдаҥҥа, Аммаҕа, Нерюнгригэ 4-түү, Бүлүүгэ, Мииринэйгэ, Намҥа 3-түү, Булуҥҥа, Дьааҥыга, Кэбээйигэ, Үөһээ Бүлүүгэ, Чурапчыга, Ленскэйскэ, Уус Алдаҥҥа 2-лии киһи  коронавирустаабыттар. Онон билигин даҕаны коронавирус  чугуйар санаата суох.

Ольга Валерьевна  быһаарбытынан, билигин ыараханнык ыалдьа сытар дьон үгүстэрэ быһыыны ылбатахтара биллэр. Киин улуустарга бары балыыһалар анал куойкаларынан  уонна  тустаах эминэн толору хааччыллыбыттарынан сибээстээн, коронавирус дьаҥын эмтээһин миэстэтигэр күүскэ ыытыллар.

Билиҥҥи туругунан, өрөспүүбүлүкэ үрдүнэн бастакы быһыыны 349 680 киһи ылбыт, итинтэн аҕам саастааҕа — 64 тыһ. киһи.  Уопсайа 80 тыһ. киһи ревакцинацияны ааспыт.  Ольга Балабкина билигин да өрөспүүбүлүкэҕэ дьаҥ туруга уустугунан сибээстээн, нэһилиэнньэ, төһө кыалларынан, тустаах быһыыны ыларыгар ыҥырда.