«Авиалесоохрана» суһал иһитиннэриитинэн, Саха сиригэр бүгүҥҥү туругунан 171 ойуур баһаара баар. Ааспыт сууккаҕа 11 тыһ. гектар иэннээх 8 ойуур баһаара умуруоруллубут.
Уустук быһыы-майгы Бүлүү, Үөһээ Бүлүү, Горнай, Эдьигээн, Кэбээйи, Ньурба, Өлүөхүмэ уонна Сунтаар улуустарыгар бүрүүкээбит. СӨ Ыксаллаах быһыыга-майгыга министиэристибэтин иһитиннэриитинэн, ити улуустарга ойуур баһаарын 141 көрдүгэнэ баара биллэр.
Бэс-Күөл, Кырыкый уонна Сүлдьүкээр нэһилиэктэригэр уоту чугаһаппат сыалтан РФ Ыксаллаах быһыыга-майгыга министиэристибэтин исписэлиистэрэ көмөҕө кэллилэр. Минерализованнай балаһалары кэҥэтии уонна уот көрдүгэннэрин умуруоруу күүскэ барар. РФ Ыксаллаах быһыыга-майгыга министиэристибэтин салгын аалларын көмөлөрүнэн Кэбээйи улууһун Сииттэтин аттыгар баар баһаары умуруорууга 24 туонна уу кутулунна уонна Хаҥалас улууһун сирин-уотун кэтээн көрдүлэр. Ааспыт сууккаҕа ойуур баһаарын умуруорууга 2423 киһи уонна 309 тиэхиньикэ үлэлээтэ.
«Бүгүн аэромобильнай бөлөхтөр Горнай, Үөһээ Бүлүү уонна Мииринэй улуустарыгар үлэлиэхтэрэ. РФ Ыксаллаах быһыыга-майгыга министиэристибэтин авиацията үлэлииргэ бэлэм. Көтөргө усулуобуйа баар буолла даҕаны Сииттэ, Кырыкый, Маалыкай, Сүлдьүкээр уонна Ыгыахтаах нэһилиэктэригэр баһаарыы умуруорууга үлэлиэхтэрэ», — диэн РФ Ыксаллаах быһыыга-майгыга министиэристибэтин Саха сиринээҕи кылаабынай управлениетын начаалынньыга Павел Гарин иһитиннэрдэ.