Муус устар 26 күнүнээҕи туругунан, “ковидынан” ыалдьыбыт дьон 19,3%-нара балыыһаҕа, 80,7%-нара дьиэҕэ сытан эмтэнэллэр диэн өрөспүүбүлүкэтээҕи суһал ыстаап иһитиннэрэр.
Суукка иһигэр лабораториялар 1079 анаалыһы, пандемия саҕаланыаҕыттан барыта 2 271 131 анаалыһы бэрэбиэркэлээбиттэр. 122 нүөмэргэ 1736 киһи эрийэн, көмөнү көрдөөбүт. 456 биригээдэ миэдиктэрэ ыалдьыбыт дьоҥҥо дьиэлэригэр тиийэн, мэдиссиинэ көмөтүн оҥорбуттар. Бүгүҥҥү күҥҥэ “ковиднай” ыарыһахтарга анаммыт 513 куойка баарыттан, 29,6%-на кураанах турар.
Ону тэҥэ, коронавируснай инфекцияны утары быһыыны биэрии салҕанар. Быһыы бастакы укуолун 618 351 киһи ылбыт, ол улахан дьон 86,2%-на буолар. Оттон быһыыны хос (ревакцинация) 158 862 киһи ылбыт. Алдан, Мэҥэ Хаҥалас, Нерюнгри, Өймөкөөн улуустарыгар ревакцинация хаамыыта бытаан.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru