Саха сиригэр бүгүҥҥү туругунан, 37 ойуур баһаарын утары үлэлэр ыытыллаллар, итилэртэн 7 баһаар тарҕаныыта тохтотуллубут. Бу туһунан СӨ Экологиятын министиэристибэтэ биллэрэр.
edersaas.ru
Баһаардар уопсай иэннэрэ 468,20 га. Бүгүҥҥү туругунан 10 баһаар Горнайга, түөртүү баһаар Үөһээ Дьааҥыга уонна Мэҥэ Хаҥаласка, үстүү баһаар Нам уонна Дьокуускай аттыгар, иккилии баһаар Томпоҕо, Уус Алдаҥҥа, Чурапчыга, биирдиилээн баһаардар Алдан, Ленскэй, Нерюнгри, Өлүөхүмэ, Орто Халыма уонна Муома улуустарыгар бэлиэтэммиттэр. Ааспыт сууккаҕа араас улуустарга 8 баһаар умуруоруллубут. Уоту утары охсуһууга 649 киһи, 62 анал тиэхиньикэ үлэлиир.
Суола-ииһэ суох уонна ыраах ойуур пуондатыгар 1356417 га иэннээх сиргэ 94 термотуочука бэлиэтэммит. Бүгүҥҥү туругунан дьон олорор сирдэригэр ойуур баһаардарыттан куттал суох.
Саха сирин Экологиятын министиэристибэтэ тыаҕа баһаары ыыппат туһугар сэрэхтээхтик туттуна сылдьарга ыҥырар. Өскөтүн тыаҕа уот барбытын көрдөххүтүнэ, Эрэгийиэннээҕи диспетчерскай сулууспаҕа 8-4112-44-74-76 нүөмэргэ эрийэн сэрэтиэх тустааххыт. Биитэр ойуур харыстабылын быһа линиятыгар 8-800-100-94-00 нүөмэргэ эрийиэххитин сөп.
Егор Карпов, «Саха сирэ» хаһыат, edersaas.ru