Ил Дархан Айсен Николаев бүгүн күнүскү брифиҥҥэ, ааспыт сууккаҕа өрөспүүбүлүкэҕэ 49 киһи коронавирустаабыта бэлиэтэммитин эттэ.
edersass.ru
Бүгүҥҥү күҥҥэ өрөспүүбүлүкэҕэ уопсайа 5 420 киһи сыстыганнаах дьаҥынан ыалдьыбыта бэлиэтэннэ. Ааспыт сууккаҕа Дьокуускай куоракка 39 киһи ыалдьыбыта бигэргэннэ. 5 киһи ИВЛ-аппараакка холбонон сытар.
Өрөспүүбүлүкэ Аҕа баһылыга сүрүн болҕомто бу күннэргэ улуустарга сынньана тиийбит оҕолорго уурулларын бэлиэтээтэ.
— Кэлиҥҥи кэмҥэ, ый курдук, коронавирус сыстыганнаах дьаҥынан ыалдьааччы ахсаана 40-50 киһиэхэ тиийэн баран, бу көрдөрүү хамсаабакка турар буолла. Киин куоракка сытыганнаах дьаҥ арыый да намыраан эрэр буоллаҕына, Мииринэй уонна Нерюнгри куораттарга ыарыы тохтообот куттала билигин да баар. Онон бу балаһыанньаны көннөрөр сорук турар. Уопсайа 3 тыһ. тест оҥоһулунна. Бу тестэр көрдөрүүлэрэ сыыйа балаһыанньаны сымнатыах курдук. Онон сибээстээн дьиэҕэ олоруу эрэсиимин өссө биир нэдиэлэ уһатан биэрэр туһунан ыйаахха илии баттаатым, — диэн бэлиэтээтэ Ил Дархан.
Елена ПОТОЦКАЯ, «Cаха сирэ» хаһыат, edersaas.ru