Ааспыт сууккаҕа 34 баһаары умуруордулар

Бөлөххө киир:

Ааспыт суукка иһигэр өрөспүүбүлүкэҕэ 34 ойуур баһаар умуруорулунна, 13 баһаар төгүрүтүлүннэ. Баһаары утары 1806 киһи, 238 тиэхиньикэ үлэлии сылдьаллар. Бүгүҥҥүттэн “Авиалесоохрана” Горнай уонна Нам улуустарыгар ойуур баһаарын умуруорууга эстиилэри оҥоруоҕа. Ол туһунан нэһилиэнньэ куттала суох буолуутун хааччыйар судаарыстыбаннай кэмитиэт салайааччыта Дмитрий Лепчиков брифиҥҥэ иһитиннэрдэ.

— Билигин да балаһыанньа ыарахан. Бүгүҥҥү күҥҥэ 135 ойуур баһаара баар, 1,264 мөлүйүөн гектар сир умайда. Билигин 516 гектар иэннээх 48 баһаары умулларыыга үлэ барар. Ааспыт сууккаҕа 78 тыһыынча гектар иэннээх 13 баһаары төгүрүттүбүт, 352 тыһыынча гектар иэннээх 34 баһаары умуруордубут. Ону тэҥэ, 2,8 тыһыынча гектар иэннээх сиргэ 15 баһаар саҥа күөдьүйэн таҕыста.

Горнай уонна Үөһээ Бүлүү улуустарыгар Өрт, Маҕарас, Күөрэлээх, Кырыкый сэлиэнньэлэрин аттыларыгар баар баһаардары суһал ыстаап хонтуруолга тутар. Бэҕэһээ Арассыыйа Ыксаллаах быһыыга-майгыга министиэристибэтин танкернай авиацията Үөһээ Бүлүүгэ, “Бе-200” амфибия-сөмөлүөт Ньурбаҕа үлэлээтилэр. “МИ-8” бөртөлүөттэр Ленскэйгэ, Өлүөхүмэҕэ, Ньурбаҕа уонна Дьокуускай аттынан үлэлээтилэр, — диэн Дмитрий Лепчиков кэпсээтэ.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru

+1
0
+1
0
+1
0
+1
0
+1
0
+1
0
+1
0