Ахсынньы 15 күнүгэр Суһал ыстаап брифинин быһа эпииргэ СӨ Доруобуйа харыстабылын миниистирэ Елена Борисова ыытта.
Бу күҥҥэ биллэр тиһэх чахчыларынан, ааспыт хонукка өрөспүүбүлүкэ үрдүнэн 200 киһи ыарыыга сутулунна. Ол иһигэр 90 киһи Дьокуускай куорат олохтооҕо. Миниистир этэринэн, киин куорат иһигэр короновирус дьаҥа күнтэн күн кыччыыра бэлиэтэнэр. “Ол оннугар улуустарга дьаҥ күүһүрүүтэ баар,” — диэн бэлиэтээтэ Елена Борисова. Ол курдук, билигин 22 улууска саҥа дьаҥынан ыалдьа сылдьар дьон баара биллэр. Ордук элбэх саҥа ыарыһах Миирнэй оройуонугар бэлиэтэммит — 16 киһи. Мэҥэ Хаҥаласка уонна Нерюнгригэ 10-нуу киһи сутуллубут. Үөһээ Бүлүүгэ уонна Тааттаҕа 7-лии киһи, Уус Алдан улууһугар 6 киһи ыалдьыбыттар. Атын улуустарга 5-тэн 1-гэ диэри саҥа ыалдьыбыт дьон көстүбүт.
— Ол да буоллар, бүгүҥҥү күҥҥэ ыарыы намтааһын өттүгэр барда диэн ааҕабыт. Биһиги билигин куойкалар ахсааннарын аччатан эрэбит. Нэдиэлэ аннараа өттүгэр 3 тыһыынча кэриҥэ куойка көһүтүүгэ турбут буоллаҕына, бүгүн 2579 куойка-миэстэ хааллардыбыт. Куойканы толоруу бүгүн өрөспүүбүлүкэ үрдүнэн 56 % тэҥнэһэр, ол аата балаһыанньа көнөн эрэрин көрдөрөр. Ыарахан туруктаах ыарыһахтар ахсааннара аҕыйаан иһэр, сүрүннээн амбулаторияҕа эмтэнээччилэр баар буолан эрэллэр. Оҕолор ыалдьалларын таһыма 2 ый устата үрдээбэтэ, ортотунан 1-2% тэҥнэһэр.
Доруобуйа харыстабылын миниистирэ лабораторнай чинчийиилэр күн аайы оҥоһулла туралларын туһунан эттэ. Ааспыт суукаҕа 1071 тест оҥоһуллубут, хамсык саҕаланыаҕыттан 826 819 чинчийии буолбут. ИХА уонна ИФА ньыматынан чинчийии бары улуустарга тарҕанан оҥоһулла турар диэн Елена Борисова биллэрдэ.
edersaas.ru