Ааспыт сууккаҕа өрөспүүбүлүкэ 10 оройуонугар эбии 17 ойуур баһаара турбута билиннэ. Ордук Алдаҥҥа, Уус Маайаҕа уонна Нерюнгрига элбэх ойуур баһаардара умайаллар.
Бу туһунан бүгүн сарсыарда СӨ экологияҕа, айылҕаны туһаныыга миниистирин солбуйааччы Андрей Коноплев өрөспүүбүлүкэтээҕи суһал ыстаап брифинигэр иһитиннэрдэ. «Ойуур баһаардара Алдаҥҥа, Кэбээйигэ, Мииринэйгэ, Нерюнгрига, Өймөкөөҥҥө, Сунтаарга, Тааттаҕа, Уус Алдаҥҥа, Уус Маайаҕа уонна Эбээн-Бытантайга эбии турбуттара билиннэ. Ордук Алдаҥҥа, Уус Маайаҕа уонна Нерюнгрига элбэх ойуур баһаардара умайаллар. От ыйын 26 күнүн сарсыардааҥҥы туругунан Алдаҥҥа, Үөһээ Бүлүүгэ, Сунтаарга, Тааттаҕа уонна Уус Маайаҕа биэс ойуур баһаара умуруоруллубут. Онон бүгүҥҥү туругунан Саха сирин үрдүнэн 73 ойуур баһаара күөх дуолу күл-көмөр оҥорор. Былырыын баччаларга 135 баһаар умайара. «Билиҥҥи туругунан 11 ойуур баһаарын умуруоруу ыытыллар. Умуруорууга 654 киһи үлэлиир уонна 28 тиэхиньикэ көмөлөһөр», — диэн миниистири солбуйааччы иһитиннэрдэ.
Саха сирин үрдүнэн бу сааскыттан барыта 428 ойуур баһаара турбута регистрацияламмыт буоллаҕына, былырыын баччаларга диэри 1231 уот турбута бэлиэтэммит.
Хаартыска — СИА.