Айылҕа харыстабыла Уопсастыба

Ааспыт сууккаҕа 14 ойуур баһаара умуруоруллубут

Ааспыт сууккаҕа Алдаҥҥа, Булуҥҥа, Эдьигээҥҥэ, Нерюнгрига, Ньурбаҕа, Өймөкөөҥҥө, Өлөөҥҥө, Томпоҕо, Уус Маайаҕа барыта 14 ойуур баһаара умуруоруллубутун туһунан СӨ экологияҕа миниистирин солбуйааччы Андрей Коноплев иһитиннэрдэ. 

Салгын аалынан бэрэбиэркэлээһин түмүгүнэн Томпоҕо уонна Өймөкөөҥҥө эбии үс ойуур баһаара турбута биллибит. Онон, атырдьах ыйын 10 күнүнээҕи туругунан, Саха сирин үрдүнэн 32 ойуур баһаара күөх дуолу күл-көмөр оҥорор. Ол курдук, Уус Маайаҕа 16,  Алдаҥҥа 11, Ньурбаҕа, Үөһээ Бүлүүгэ, Орто Халымаҕа, Томпоҕо, Өймөкөөҥҥө 1-дии ойуур баһаардара умайаллар. Былырыын баччаларга 172 уот баара.

Билигин алта уот умуруоруллар, мантан түөрдэ Алдаҥҥа, Үөһээ Бүлүүгэ, Ньурбаҕа, Орто Халымаҕа бохсуллубут. Барыта 777 киһи үлэлиир, 27 анал тиэхиньикэ көмөлөһөр.  Ан-26 зондировщик-сөмөлүөт Уус Маайа улууһугар үлэлээбитэ. Сөптөөх былыт үөскүүр түгэнигэр, тустаах үлэтин салгыы толоруоҕа. Ону тэҥэ, Бе-200 диэн амфибия-сөмөлүөт туһаныллара былааннаныллыбыт.

0
0
Telegram @edersaas20