Ааспыт сууккаҕа Нерюнгрига 3, Алдаҥҥа 2, Дьааҥыга, Эдьигээҥҥэ, Мииринэйгэ, Томпоҕо, Уус Алдаҥҥа 1-дии ойуур баһаардара умуруоруллубуттарын туһунан бүгүн СӨ экологияҕа, ойууру туһаныыга уонна ойуур хаһаайыстыбатын миниистирин солбуйааччы, кылаабынай лесничей Андрей Коноплев иһитиннэрдэ.
Атырдьах ыйын 4 күнүн сарсыардааҥҥы туругунан, Үөһээ Бүлүүгэ, Бүлүүгэ, Сунтаарга, Уус Маайаҕа барыта 10 ойуур баһаара бохсуллубут. Анал бэрэбиэркэ түмүгүнэн эбии ойуур баһаара турбатах. Онон билигин Саха сирин үрдүнэн барыта 81 ойуур баһаара күөх дуолу күл-көмөр оҥорор. Былырыын баччаларга 178 ойуур уота умайара. «Билиҥҥи туругунан барыта 14 ойуур баһаарын умуруорууга миэрэ ылыллар. Барыта 1131 киһи үлэлиир уонна 98 тиэхиньикэ көмөлөһөр. Ону тэҥэ, 8 Ми-8 бөртөлүөт уонна 13 салгын аала анал көтүүлэри оҥордулар. Бэҕэһээ Бе-200 сөмөлүөт Ньурба улууһугар ойуур баһаарын умулларыыга үлэлээтэ. Бүгүн сөптөөх былыт баар буоллаҕына, «Авиалесоохрана» тэрилтэтин Ан-26 «Циклон» уонна Росгидромет Як-42 зондировщик-сөмөлүөттэрэ ойуур баһаардара умайар улуустарыгар анал көтүүлэри оҥоруохтара», — диэн СӨ экологияҕа, ойууру туһаныыга уонна ойуур хаһаайыстыбатын миниистирин солбуйааччы, кылаабынай лесничей Андрей Коноплев иһитиннэрдэ.
Быйыл сааскыттан Саха сирин үрдүнэн барыта 504 ойуур баһаара турбут буоллаҕына, былырыын баччаларга 1339 уот күөх дуолу мэҥиэстэрэ. Рослесхоз быһаарбытынан, бүгүн ойуур баһаардара туруон сөптөөх улуустарынан Алдан, Үөһээ Бүлүү, Ньурба, Таатта, Уус Маайа уонна Хаҥалас буолаллар.