СӨ Айылҕа харыстабылын министиэристибэтэ иһитиннэрбитинэн өрөспүүбүлүкэ ойуурдарын сиригэр-уотугар 25 ойуур баһаарын умулларыы үлэтэ ыытыллар.
Өрөспүүбүлүкэ 14 оройуонугар баһаарга былдьаммыт сир уопсай иэнэ 26 201,1 га. Ойуур баһаара Хаҥаласка — 1, Ньурбаҕа -4, Сунтаарга — 4, Ленскэйгэ — 1, Үөһээ Бүлүүгэ -4, Уус Маайаҕа — 1, Кэбээйигэ -1, Тааттаҕа -1, Өлүөхүмэҕэ -2, Өймөкөөҥҥө -1, Дьокуускайга -1, Бүлүүгэ-1, Мэҥэ Хаҥаласка -1 бэлиэтэммит. Итинтэн Ньурбаҕа, Сунтаарга, Хаҥаласка, Тааттаҕа, Мэҥэ Хаҥаласка барыта 13922.3 га иэннээх 5 ойуур баһаара бохсулунна. Баһаардары умулларыыга барыта 1340 киһи уонна 131 тиэхиньикэ үлэлээтэ.
Ааспыт сууккаҕа 81,5 га иэннээх түөрт ойуур баһаара умулларылынна.
СӨ Экология министиэристибэтин ойуур харыстабылыгар департаменын салайар Владимир Иванов бэлиэтээбитинэн, өҥүрүк куйаас күн-дьыл туруоҕуттан, ойуур баһаара элбээбит.
«Ааспыт өрөбүллэргэ, бэс ыйын 19-21 күннэригэр, ойуур баһаарын умулларар сулууспалар баһаары умуруорууга үлэлии тиийбит дьону кытары өрөспүүбүлүкэ үрдүнэн барыта 356 га иэннээх 14 ойуур баһаарын умуллардылар. Бүгүҥҥү күҥҥэ ойуур баһаарын манабылыгар 14 сөмөлүөт үлэлиир. Баһаар туруон сөптөөх кутталлаах сирдэргэ үлэ күүһүн уларытыы ыытыллар. Ойуур баһаарын умулларыыга «Авиалесоохрана» ФБУ 196 үлэһитэ, «Приморьетааҕы ойуур харыстабылын салгынынан уонна сиринэн харабыллыыр базатын» КГБУ 120 үлэһитэ, «Уһук Илиҥҥи ойуур харыстабылын авиационнай базатын» 53 үлэһитэ үлэлээтилэр», — диэн иһитиннэрдэ.
Ыксаллаах быһыы-майгы Ньурба, Томпо, Үөһээ Бүлүү, Сунтаар уонна Өймөкөөн улуустарыгар бэлиэтэнэр.