Ааспыт нэдиэлэҕэ Саха сиригэр 5987 киһи ОРВИ-нан ыалдьыбыта бэлиэтэммит

Ааспыт нэдиэлэҕэ Саха сиригэр 5987 киһи ОРВИ-нан ыалдьыбыта бэлиэтэннэ диэн Роспотребнадзор өрөспүүбүлүкэтээҕи управлениета иһитиннэрэр.

Ыалдьыбыттартан 65%-а — оҕолор, 35%-а — улахан дьон. Лабораторияҕа чинчийии түмүгэр өрөспүүбүлүкэҕэ негриппознай этилогиялаах парагрипп, аденовирустар, RC-вирустар, риновирустар, бокавирустар, метапневмовирустар бааллара биллибит. 19 нэдиэлэ устата парагрипп вирустара баһыйбыттар.

Ыарыы баар кэмигэр ОРВИ-нан ыалдьыбат туһуттан маннык дьайыылары тутуһуҥ диэн Саха сиринээҕи Роспотребнадзор управлениета сэрэтэр:

• элбэх киһи мустар сиригэр мааскалаах, респиратордаах сылдьыҥ;
• социальнай дистанцияны тутуһуҥ, уопсастыбаннай тырааныспарынан айанныыргытын аччатыҥ;
• тус гигиенаны тутуһуҥ, антисептигы туттуҥ;
• дьиэҕитин салгылатыҥ, сууйуҥ-сотуҥ;
• таһырдьаттан киирэн баран муннугутун суунуҥ;
• күн-дьыл туругар сөп түбэһэрдик таҥныҥ;
• ыалдьыбыт киһини кытта алтыстаххытына вирус утары эмтэри иһиҥ;
• С битэмииннээх аһы элбэхтэ сиэҥ (клюква, отон, лимон уо.д.а.);
• чөл олоҕу тутуһуҥ, сөптөөхтүк аһааҥ, успуордунан дьарыктаныҥ.

Роспотребнадзор сэрэтэр: ОРВИ сибикитэ билиннэҕинэ бэйэҕит эмтэнимэҥ, дьиэҕэ бырааһы ыҥырыҥ!

Хаартыска: gairb56.ru