Тохсунньу 5-9 күннэригэр «Арассыыйа -– мин устуоруйам» устуоруйа пааркатыгар сэбиэскэй кэмнээҕи елка оонньуурдарын уонна араас киэргэллэр быыстапкалара буолуоҕа.
edersaas.ru
Бу күннэргэ Тереза Пачеко Чавес уонна Антонина Строева кэллиэксийэлэриттэн Саҥа дьыллааҕы араас оонньуурдары, аккырыыккалары, баататтан оҥоһуллубут Тымныы Оҕонньору, Хаарчаананы, мааскалары уонна араас гирляндалары көрөн, оччотооҕу кэмҥэ төннөн ылыахтара.
Сүрүннээн ааспыт үйэ 50-60 сыллардааҕы өстүөкүлэ оонньуурдара бу кэм оччотооҕу оҕолоругар, билигин сааһыра барбыт дьоҥҥо ахтылҕан сылааһынан илгийиэхтэрэ, оттон эдэр дьоҥҥо улахан интэриэһи тардыахтара.
Тереза Чавес кини маннык урукку кэм кэрэһиттэрэ буолбут таас оонньуурдары үс сыл устата мунньубутун, онон дьоҥҥо-сэргэҕэ көрдөрөр кэм кэлбитин бэлиэтиир. Кини кэллиэксийэтин сороҕо СӨ Национальнай бибилэтиэкэтигэр эмиэ көрдөрүүгэ тураллар.
Тереза Пачеко-Чавес — Арассыыйа Худуоһунньуктарын сойуууһун чилиэнэ. Кини Ленинградка төрөөбүтэ, Мэҥэ Хаҥалас улууһун Хаптаҕай сэлиэнньэтигэр улааппыта.
Маннык винтажнай быыстапканы куорат олохтоохторугар уонна ыалдьыттарыгар билиһиннэрэр санааны Устуоруйа пааркатын дириэктэрэ Дмитрий Соловьев көҕүлээтэ.
Надежда ЕГОРОВА, «Саха сирэ», edersaas.ru