СӨ бырабыыталыстыбатын бэрэссэдээтэлин солбуйааччы Ольга Балабкина тохсунньу 11 күнүгэр Суһал ыстаап брифинин күнүс 12 чааска быһа эпииргэ тахсан ыытта.
edersaas.ru
Ааспыт күҥҥэ өрөспүүбүлүкэ үрдүнэн 124 сутуллубут киһи көстүбүт. Олортон 48 киһи Дьокуускай куоракка. Мииринэй улууһугар 12 киһи, Нерюнгрига 10, Алдаҥҥа 9, Мэҥэ Хаҥаласка, Аммаҕа 7-лии киһи ыалдьыбыт. 1-4 сутуллуу түгэнэ 13 улууска бэлиэтэммит. Сорох хотугу уонна чугас улуустарга саҥа ыалдьыбыт дьон көстүбэтэҕэ үөрдэр.
Ольга Валерьевна ыарыы тэтимэ намтааһыныгар харыстаныы эрэ дьайбатын туһунан бэлиэтээн эттэ. Тохсунньу маҥнайгы декадатыгар үгүс тымныйыы сибикилээх дьон бырааһынньык кэмигэр дьиэҕэ хаалар санааттан балыыһаҕа барбатах буолуохтаахтарын туһунан эттэ. Онон билигин ыарыы сибикитэ көһүннэ эрэ быраастарга көрдөрүнэн тугунан ыалдьыбыккытын быһаара охсор олус суолталаах.
Суукка иһигэр 2000 кэриҥэ коронавируска тест оҥоһуллубут, лабораториялар өрөбүл күнэ суох үлэлэрин салҕыыллар. Хамсык саҕаланыаҕыттан 880 328 тест оҥоһуллубут
Өрөспүүбүлүкэҕэ вакцинация тэрээһинэ кэҥээн иһэрин туһунан этилиннэ. Вакцинация былаана кэҥитиллэн нэһилиэнньэ саҥа араҥаларын хабара күүтүллэр, онуоха анаан саҥа былаан таҥылла турар. Бу кэмҥэ диэри быраастар уонна социальнай тэрилтэлэр үлэһиттэрэ коронавируһу утары быһыыны ылар эбит буоллахтарына, билигин тырааныспар үлэһиттэрэ, сокуону харыстааччылар, учууталлар уонна дьону кытта ыкса үлэлиир судаарыстыба, муниципалитет үлэһиттэрэ быһыы уочаратыгар киириэхтэрэ.
— Бу профилактика миэрэтин хас биирдии киһи бэйэтэ баҕатынан барыахтаах. Доруобуйа харыстабылын үлэһиттэрэ таҥыллыбыт графиктарынан үлэлииргэ бэлэмнэр. Коронавируһу утары быһыыны олорор сиргитигэр баар поликлиникаҕа ылыахха сөп, эбэтэр тэрилтэнэн күргүөм быһыы тэрийиэххэ сөп — диэн Ольга Балабкина тоһоҕолоон эттэ.
«Саха сирэ» хаһыат, edersaas.ru