Күн бүгүн аармыйаҕа сааскы ыҥырыы үлэтэ барар турар. Быйыл коронавируһунан сибээстээн, болдьоҕо көспүтэ. Ол курдук, саҥа барааччылары пууннартан ыам ыйын 20 күнүттэн саҕалаан ыыталыахтаахтар. Оттон аармыйаттан кэлээччилэр икки нэдиэлэ устата дьиэҕэ олоруохтаахтар.
Ил Дархан Айсен Николаев ыам ыйын 8 күнүгэр социальнай ситимнэринэн ыыппыт быһа сибээһин кэмигэр, Байаҥкамаат салалтатын кытта кэпсэппитин, ыҥырыы куттала суох ааһарын туһугар бары миэрэлэри ылыахтара диэн иһитиннэрбитэ.
Оттон аармыйаттан сулууспалара бүтэн кэлээччилэр, ирдэбил быһыытынан икки нэдиэлэ дьиэҕэ олоруохтаахтар. Маныаха өрөспүүбүлүкэ олохтоохторо аармыйаттан кэлээччилэр икки нэдиэлэ Дьокуускай куоракка олорон баран улуустарыгар кэллиннэр диэн этии киллэрэллэр эбит. Ил Дархан: “Дьокуускай куорат икки нэдиэлэ устата хас даҕаны тыһыынча киһини обсерваторга сытыарар кыаҕа суох. Аармыйаттан кэлээччилэри да өйдүөххэ сөп, түргэнник дьиэлэригэр барарга тиэтэйэллэр. Маныаха саамай сүрүнэ, бу туһунан эрдэ эмиэ этэн турабын — улуус баһылыктарын, олохтоох тэриллиилэр эппиэтинэстэрэ. Кинилэр онно икки нэдиэлэ устата дьиэҕэ олороллоругар усулуобуйа хааччыйаллар.
Хомойуох иһин, Мэҥэ Хаҥалас уонна Усуйаана улуустарыгар саллааттар аармыйаттан коронавируска сыстан кэлбит икки түгэннэрэ бэлиэтэнэр. Биллэн турар, маныаха олохтоох былаас, дьиэ кэргэн, аармыйаттан кэлбит киһи өттүттэн кытаанах хонтуруол наада”, — диэн эппитэ.
Улуустар дьаарханаллара оруннаах. Сорох улуустарга, дьолго ыарыы биир даҕаны түгэнэ бэлиэтэнэ илик. Аармыйаттан кэлбит дьон даҕаны көрдөһөн туран ыарыыны “уктан” кэлбэттэрэ чахчы. Ол эрээри, кинилэртэн, кинилэр дьиэ кэргэннэриттэн бүтүн нэһилиэк, улуус доруобуйатын туруга тутулуктааҕын ханнык даҕаны түгэҥҥэ умнуо суохтаахтар.
Людмила ПОПОВА, edersaas.ru