Саха сиригэр муус устар 1 күнүттэн от ыйын 15 күнүгэр диэри байыаннай сулууспаҕа ыҥырыы хампаанньата ыытыллар.
Быйыл өрөспүүбүлүкэ үрдүнэн 1300 кэриҥэ ыччат байыаннай сулууспаҕа ыҥырыллыахтаах. Военкомат байыаннай сулууспаҕа ыҥырыы хампаанньатын ыытарыгар, коронавирус дьаҥын утары охсуһар бары миэрэлэри тутуһар, учуоттуур. Ол курдук, призывниктар бастаан туспа сиргэ мустан COVID-19 вируска анаалыс туттараллар, үчүгэй эрэ анаалыстаахтар ыҥырыы пуунугар бараллар.
— Анаалыс туттарыыта түмүктэри биэрдэ — ИХА ньыматынан анаалыстаммыт 120 призывник ортотугар ыалдьыбыт киһи суоҕа чопчуланна. Оттон хантаактаах буолара сабаҕаланар киһи 14 күннээх харантыыҥҥа олордуллар. Ити кэмҥэ ыарыы сибикитэ көстүбэтэҕинэ, салгыы ыҥырыы тэрээһинигэр төннөр — диир, военкомат ыҥырыы салаатын салайааччыта майор Вадим Чикильдин.
Сотору кэминэн аармыйаҕа ыҥырыллааччыларга быһыы биэрэллэрэ күүтүллэр. Маҥнайгы бөлөх призывниктар муус устар 17 күнүгэр Хабаровскай кыраайга айаннаабыттара.
«Саха сирэ» хаһыат, edersaas.ru
Хаартыска ЯСИА