Сэтинньи 17 күнүгэр «Арассыыйа — мин остуоруйам» историческай пааркаҕа Аҕа дойду сэриитин аатырбыт снайпера Иван Кульбертинов төрөөбүтэ 100 сылыгар аналлаах Бүтүн Арассыыйатааҕы «Аармыйаҕа ыҥырыллааччылар» күннэрин бэлиэтээтилэр. Тэрээһиҥҥэ Саха Өрөспүүбүлүкэтин Ыччат дьыалатын уонна дьиэ кэргэн бэлиитикэтин миниистирин эбээһинэһин толоро сылдьар Василина Лукина, өрөспүүбүлүкэ байыаннай комиссара Артын Димир — Оол Иванович, Өрөспүүбүлүкэтээҕи үлэ уонна сэрии бэтэрээннэрин сэбиэтин бэрэссэдээтэлин солбуйааччы Галина Лебедева уонна Саха Өрөспүүбүлүкэтин «Саллааттар уонна мотуруостар төрөппүттэрин кэмитиэтин» бэрэссэдээтэлэ Мария Емельянова кыттыыны ыллылар. 
Тэрээһиҥҥэ күһүҥҥү ыҥырыыга түбэһэн, сулууспалыы бараары сылдьар уолаттары аармыйаҕа атаардылар. Хас биирдиилэригэр блокнот, уруучука уонна Иван Кульбертинов олоҕун туһунан суруллубут өйдөбүнньүк туттардылар. Афганистан, Хотугу Кавказ уот сэриитигэр сылдьыбыт бэтэрээннэр уолаттарга баҕа санааларын эппиттэрэ сулууспаларыгар көмө буолара чахчы. Тэрээһин түмүгэр ыалдьыттарга үөрүүлээх бырааһынньык остуолун тардан аһаттылар. 
Санатан эттэххэ, аармыйаҕа күһүҥҥү ыҥырыы алтынньы маҥнайгы күнүттэн ахсынньы 31 күнүгэр диэри буолар.
Николай Попов, «Саха сирэ» хаһыат, edersaas.ru