Мэҥэ Хаҥалас улууһун Моорук Суолата нэһилиэгин олохтооҕо дьахтар COVID-19 ыарыыга сыстыбыта билиннэ. Ыарыыга аармыйаттан соторутааҕыта кэлбит уол оҕотуттан сыстыбыт буолуон сөп диэн сабаҕаланар.
Билигин дойду араас сирдэриттэн сулууспалара бүппүт уолаттар кэлэллэрэ күүтүллэр. Бу балаһыанньаҕа хайдах быһыылаах дьаһаллар улууска ылыллалларын туһунан Мэҥэ Хаҥалас улууһун баһылыгыттан Николай Прокопьевич Старостинтан ыйыттыбыт:
— Бу сыл биһиги улууспутугар 42 биир дойдулаахпыт аармыйаттан кэлэрэ күүтүллэр. Уон киһи билигин кэлэн дьиэлэригэр бэйэни хааччахтаныы эрэсиимигэр олорор.
Саллааттарбыт сөмөлүөтүнэн уонна пуойаһынан айаннаан кэлэллэр. Сөмөлүөтүнэн кэлээччилэр туспа көрсөллөр, ол туһунан биһиэхэ Роспотребнадзор сэрэтэр. Оттон пуойаһынан кэлээччилэри бэйэбит көрсөбүт. Барыларын учаастактааҕы быраастар кэтээһиҥҥэ ылаллар, эппитим курдук, бэйэни хааччахтаныы эрэсиимигэр олордоллор.
Ол эрээри, мантан ыла аармыйаттан кэлэр уолаттары тутатына арыый кытаанах, обсерватор эрэсиимигэр киллэрэр буоларбыт буолуо.
Егор Карпов, edersaas.ru
Хаартыска — якутск.рф