Бу күннэргэ социальнай ситимнэринэн Олоҥхо ыһыаҕын Аал Луук Маһын туруора сылдьар хаартыскалара тарҕанна. Санатан эттэххэ, Олоҥхо ыһыаҕа Өлүөхүмэ улууһугар буолуохтаах.
Быйылгы Олоҥхо ыһыаҕа Өлүөхүмэ улууһугар Өлүөнэ өрүһү үөһэттэн өҥөйөн сытар айылҕа анаан-минээн айбыт сиригэр — Аанньаах хочотугар ыытыллыахтаах. Бу күннэргэ Аанньаах хочотуттан Аал Луук Маһы туруора сылдьар хаартыскалар тарҕаннылар. Ыһыах туһунан дьон санаата араас. Эдэр саас сайт кэрэспэдьиэнэ улуус баһылыгыттан Николай Харбинтан туоһуласта:
— Тутуу Аанньаах хочотугар эрэ буолбакка, өрөспүүбүлүкэ ханнык баҕарар улууһугар курдук Өлүөхүмэҕэ эмиэ национальнай бырайыактартан саҕалаан, былаан быһыытынан барар. Ол иһигэр ыһыах түһүлгэтэ эмиэ. Күн бүгүн улууска тутуу 12 былаһааккаҕа барар. Хара маҥнайгыттан хас биирдии үлэһити учуокка ылбыппыт. Билиҥҥитэ 190 киһи үлэлиир. Эпидемиологическай миэрэлэри барытын тутуһун үлэлииллэр. Инньэ гынан, тутуу кыраапык быһыытынан хаамар.
Олоҥхо ыһыаҕа – өрөспүүбүлүкэ таһымнаах тэрээһин. Өрөспүүбүлүкэ, улуус култуураҕа уратытын көрдөрөр. Биллэн турар, билиҥҥи курдук уустук балаһыанньаҕа, бастатан туран, дьон доруобуйатын көрүөхтээхпит. Ол эрээри, биһиги былааннаммытын курдук ыһыах тутуутун ыыта сылдьабыт. Үбүлээһин көрүллүбүтүн быһыытынан үлэ барар. Ыарыы суоҕа буоллар, бэлэмнэниини өссө күүһүрдүөхтээх этибит, — диэн санаатын үллэстэр.
Аанньаах хочотугар үлэ 70-тан тахса бырыһыана бүттэ диэн улуус баһылыгын тутуу боппуруостарыгар солбуйааччы Борис Полуэктов иһитиннэрэр. “Саха сирэ” хаһыат эрдэ суруйбутун курдук, Өлүөхүмэ аэропорда, уу ыраастыр ыстаансыйа саҥардыллар, инбэлииттэр интэринээттэрин дьиэтэ, көһөрүүнэн сибээстээн олорор дьиэлэр тутуллаллар, суол өрөмүөннэнэр, о.д.а. тутуулар бааллар. “Чопчу Аанньаах хочотун туһунан эттэххэ, 350 миэстэлээх ипподром тутуллар. Ону таһынан — Тойон түһүлгэ, олоҥхоһуттарга туостан ураһа, Айыы аана, Аал Луук Мас, олоҥхоһут оҕолор түһүлгэлэрэ. Бу сүрүн эбийиэктэр бэс ыйын 15 күнүгэр бэлэм буолуохтаахтар. Салгыы кыра тутуулар — былаһаакка, Ытык Дулҕа, кымыс иһиитин сиэрин киинэ, ураһалар, быыстапкалыыр киин, дэлэгээссийэли көрсөр былаһаакка, сыана, хорчуопка, бэсиэдкэ хаалаллар. “Якутскэнерго” тэрилтэ уоту киллэриитин үмүрүтэн эрэр. Нэһилиэктэр, тэрилтэлэр бэйэлэрин түһүлгэлэрин туталлара хаалан турар. Аанньаах хочотун бырайыактааһын 2016 сылтан, тутуу былырыыҥҥыттан саҕаламмыт буолан былаан быһыытынан хааман иһэр”, — диэн кэпсиир.
Былырыын бэлэмнэнэ таарыйа улуус ыһыаҕын манна ыыппыттара. Дьон төһө даҕаны араастаан саҥардар, эрдэттэн көрүллүбүт үп аналлаах соругунан туһаныллыахтаах, тутуу былаан быһыытынан барыахтаах.
Людмила ПОПОВА, “Саха сирэ” хаһыат, edersaas.ru