Култуура Сүрүн Уопсастыба

Аанньаах Хочотугар күнү көрсүү сиэрэ-туома

Саха норуота былыр-былыргыттан күҥҥэ, халлааҥҥа сүгүрүйэр. Күн саамай уһаан, түүнэ кылгаан, Үрдүк Айыылар сиргэ муҥутуур чугаһаан турар кэмнэригэр, Күнү көрсүү сиэрэ-туома ыытыллар. Бу самаан сайын сатыылаабытын, сахаҕа саҥа дьыл саҕаламмытын уонна Үрүҥ Тунах Ыһыах бэлиэтинэн буолар.

edersaas.ru

Бу күн Күн уонна айылҕа күүһэ киһиэхэ суолталаах, эмтиир күүстээх диэн этэллэр. Чопчу бу эрэ күн, бу эрэ чаас өбүгэлэрбит Күн диэки хайыһан, илиилэрин өрө уунан, Үрдүк Айыылартан, өбүгэлэриттэн кэлэр сылга быйаҥнаах үүнүүнү, ситиһиини уонна доруобуйаны түстүүрүгэр көрдөһөллөрө.

Аанньаах Хочотугар Күн тахсарын көрсүү сиэригэр дьон-аймах тоҕуоруста, ыалдьыттар уонна кыттааччылар Күнү көрсүү түһүлгэтигэр муһуннулар. Үгүстэр нэһилиэктэртэн кэлбиттэр, Олоҥхо тыйаатырыттан ыалдьыттар, Өлүөхүмэ улууһун баһылыга Николай Харбин кэргэнин кытта бааллар.

Күнү көрсүү кэмигэр ыраас, сөрүүн салгын илгийэр, бу иннинээҕи күн түспүт ардах Аанньаах Хочотугар сиигин ыспыт.

Күн саҕахтан тахсар бастакы сардаҥалара көстөллөр, ону кытта алгысчыт бөлөх дьонун кытта Күнү көрсүү сиэрин-туомун толороллор. Алгысчыт Күҥҥэ, Үрдүк Айыыларга сүгүрүйэн, Өлүөхүмэ сиригэр ыытыллар ыһыах дьоһуннаахтык, үрдүк таһымнаахтык барарыгар, Орто Дойду дьоно-сэргэтэ бары доруобай, дьоллоох, Өлоохуна сиригэр-уотугар хойуу от, бааһыналарыгар быйаҥнаах үүнүү тосхойорун, Аар Айылҕабытын, Өлүөнэ эбэбитин харыстыырбытыгар, былыргы уонна эдэр Өлүөхүмэ чэчирии сайдарын туһугар көрдөстө.

Алгыс сиэрин кэнниттэн Күнү көрсөөччүлэр бары тоҥонохторуттан ылсан, төгүрүччү туран, Аанньаах Хочотугар өлүөхүмэлии доҕордуу оһуохайга эргийдилэр.

Алгыс баһа сыаланнын! Бу күн, бу сыл ситиһиилээх буоллун!

 

Валерий МАЛЫШЕВ, “Өлүөхүмэ” хаһыат.

Ааптар хаартыскаҕа түһэриилэрэ.

1
0