Бэҕэһээ, Олоҥхо ыһыаҕын ытык сиригэр, олоҥхоһуттарга аналлаах туос ураһаны арчылааһын сиэрин-туомун ыыттылар. Биллэрин курдук, Ил Дархан Айсен Николаев бэс ыйын 1 күнүгэр нэдиэлэ бүтүөр диэри Олоҥхо ыһыаҕын тохтотор туһунан этии бэлэмнииллэригэр сорудахтаабыта. Туһааннаах ыйаахха илии баттана илик.
“Уран” дизайн тутар маастардара балачча кыһаллыбыттар. Көрүөхтэн эриэккэс, улахан тутуу хочо көстүүтүгэр бэркэ барсар, Өлүөхүмэ сиригэр маҥан куба кэлэн түһэн, бэлиэ тэрээһин кыттааччыларын уруйдуу көрсөргө дылы.
Арчылааһыҥҥа улуус баһылыга Николай Харбин, “Харысхал” сиэри-туому толорор бөлөх, улуустааҕы култуура управлениетын үлэһиттэрэ уонна Өлүөхүмэ олоҥхоһуттарын кэлэктиибэ кытыннылар. Шараборин-Кумаарап “Улуу Дьаарын Бухатыыр” олоҥхотуттан быһа тардан толордулар.
Салгыы Аанньаах Хочотун илин өттүгэр, нэһилиэктэр түһүлгэлэрэ тутулла турар сирдэригэр, устудьуоннар кэчигирэһэн турдулар, Арассыыйатааҕы устудьуоннар тутар этэрээттэрин былааҕын күөрэччи астылар. Бу — Өлүөхүмэ тиэхиньикумун тутар этэрээтэ Олоҥхо ыһыаҕын эбийиэктэригэр үлэтэ саҕаламмытын туоһулаата.
Эдэр тутааччылары улуус баһылыга Николай Харбин, тиэхиньикум дириэктэрин солбуйааччы Евгений Березин, тутуунан дьарыктанар урбаанньыт Тигран Варданян эҕэрдэлээтилэр. Саҥа анал таҥастаах, кааскалаах байыастар үлэлиир үнүстүрүмүөннэрин, коронавирус дьаҥыттан харыстанар сириэстибэлэри туттулар уонна таһаарыылаахтык үлэлииргэ бэлэмнэрин, үлэҕэ-хамнаска куттал суох буолуутун быраабылатын туһуохтарын туһунан биллэрдилэр. Уопсайа, 24 байыас бөлөхтөргө арахсан, биригэдьиирдэр салайыыларынан тутааччылар сорудахтарын толороллор.
Валерий МАЛЫШЕВ (Өлүөхүмэ).
Ааптар хаартыскаҕа түһэриилэрэ.