Уопсастыба

Аан дойдутааҕы ювелирдар куонкурустарыгар саха кыыһа кыайда

Бу күннэргэ Москва куоракка ыытыллыбыт Аан дойдутааҕы J-1 ювелирдар быыстапкаларыгар Уус Алдан улууһун  Тандатыттан төрүттээх Варвара Соловьева кыайыылаах үрдүк аатын ылла.

Бу туһунан Уус Алданнааҕы култуура управлениетын сүрүннүүр исписэлииһэ Анна Федорова иһитиннэрдэ:

Быыстапка-конгресс быйыл 2-с төгүлүн ыытылынна. Быыстапкаҕа барыта 400-тэн тахса үлэ киирбититтэн, 41 кыттааччы финалга тахсан, араас хайысхаларынан 9 номинацияҕа күөн көрсүбүттэр. Варвара “Лучший скульптор. Ювелирная пластика” номинацияҕа бастыҥынан ааттанна. Үс күн устата ыытыллыбыт быыстапка-конгресс кэмигэр аан дойду араас муннуктарыттан ювелирдар, дизайнердар мустан сытыы боппуруостары туруоран ырытыһыы, маастар кылаастары ыыппыттар. Быыстапка дьүүллүүр сүбэтигэр ювелирнай дьыала маастардара, бэрэссэдээтэлинэн бэйэтэ туспа Ilgiz F ювелирнай бреннээх, аан дойду таһымнаах International Jewellery Design Excellence Award көрүүлэр 2 төгүллээх кыайыылаахтара уонна Гран-при хаһаайына, худуоһунньук-ювелир-эмальер Ильгиз Фазулзянов үлэлээбиттэр.


Варя кыыс өссө оскуолаҕа үөрэнэр сылларыттан, оччолорго национальнай культура учууталынан үлэлиир Марфа Ноговицына салайыытынан, Тандатааҕы историко-архитектурнай мусуой экспонаттарыгар олоҕуран  “Күөгэтэр Уус оһуора-мандара” диэн темаҕа дакылаат суруйан НПК-ҕа кыттыбыт. Бу мантан сиэттэрэн кинини көмүс ууһун идэтэ умсугуппут. “Хайдах маннык тимири ыллатыахха сөбүй, хайдахтаах курдук мандардаан киэргэтиэххэ сөбүй” диэн сөхпүтэ кини сүрэҕэр хаһан да ааспаттыы иҥпитэ. Оскуоланы бүтэрэр сылыгар кини туох үлэһит буолуохтааҕар боппуруос турбатаҕа. Бииргэ төрөөбүт эдьиийэ Мария сүбэтинэн Дьокуускайдааҕы технология уонна дизайн колледжыгар докумуонун туттарбыта. Варвара бу талан ылбыт идэтин олус сөбүлээн айа-тута, үлэлии-хамсыы сылдьар. Кини “Бу идэни талбыппын биир да күн кэмсиммэппин. Үөрэх туттарсарбар эдьиийим Мария хайаан да киириэ диэн эрэллээҕэ, ол эрэлэ миэхэ төһүү күүс буолбута” диэн этэр. Варвара салгыы Арктикатааҕы культура уонна искусство институтун бүтэрэн таптыыр, сөбүлүүр идэтинэн айымньылаахтык үлэлии сылдьар. Бу сыллар устата араас таһымнаах регионнааҕы, Россиятааҕы, аан дойдутааҕы быыстапкаларга ситиһиилээхтик кыттар. Биир дойдулаахпытыгар, эдэр маастарга салгыы да бу курдук айа-тута сылдьарыгар, үрдүк ситиһиилэр кэлэ турдуннар диэн баҕарабыт.

 

Елена ПОТОЦКАЯ, «Саха сирэ» хаһыат, edersaas.ru

 

1
0