Аан дойдутааҕы кинигэ быыстапкатыгар кыһыл көмүс мэтээли ылбыт “Төрүт дьарык” кинигэни билиһиннэрдилэр
“Бэчээт тиэргэнэ-2017” тэрээһиҥҥэ С.А.Новгородов аатынан “Бичик” кинигэ кыһата былырыын Владивосток куоракка “Бэчээт тиэргэнэ-2016” уонна быйыл Лондон куоракка 46-с төгүлүн буолан ааспыт аан дойдутааҕы кинигэ быыстапка-дьаарбаҥкатыгар дипломант, кыһыл көмүс мэтээл хаһаайыннара “Төрүт дьарык” үөрэх босуобуйатын билиһиннэрдилэр.
Үрдүк наҕараадаҕа тиксибит кинигэ ааптардарынан СӨ национальнай оскуолаларын чинчийэр институт сүрүннүүр научнай үлэһитэ, педагогическай наука хандьыдаата Г.М.Федоров (ааптардар бөлөхтөрүн салайааччыта), Мэҥэ Хаҥалас улууһун Хорообут агро хайысхалаах оскуолатын алын кылааһын учууталлара В.В.Птицына, М.А.Осипова, Е.В.Тастыгина, М.Г.Бугаева буолаллар.
«Бичик» кинигэ кыһатын дириэктэрэ Август Егоров:
“СӨ үөрэҕин уонна наукатын министиэристибэтин, ааптардарбытын кытта ыкса ситимнээх үлэбит бу курдук үтүө түмүктэри биэрдэ. Наҕараада наҕарааданан, кыайыы кыайыынан, ол гынан баран, саамай сүрүнэ – биһиги таһаарар үөрэх кинигэлэрбит бэйэбит оҕолорбут төрөөбүт тылларынан сөпкө саҥарар, үөрэнэр, ылынар кинигэлэрэ буолуохтаахтар. Оннук кинигэлэри оҥороргор биһиги ааптардарбыт, институт, университет үлэһиттэрэ уонна кэлиҥҥи кэмҥэ, үөрүөхпүт иһин, улуустарбыт, нэһилиэктэрбит орто оскуолаларын айар-тутар дьоҕурдаах учууталлара көхтөөхтүк кытталлар. Онон СӨ үөрэҕин уонна наукатын министиэристибэтигэр, ааптардарбытыгар махтанабыт”, — диэн эттэ.
Кэлиҥҥи кэмҥэ саха оҕото төрүт дьарыктан, күннээҕи үлэттэн тэйэн эрэр. Онон “Төрүт дьарык” кинигэ оҕону кыра сааһыттан өбүгэлэрбит үгэстэрин билиһиннэрэр, көрдөрөр кыахтаах диэн экиспиэрдэр бэлиэтииллэр.
Манна эбэн эттэххэ, Арассыыйатааҕы үөрэх ыстандаарта киирээтин кытта, маҥнайгынан бу ирдэбилгэ эппиэттиир кинигэни “Бичик” кинигэ кыһата уонна башкирдар, хакаастар таһааран тураллар. Ол курдук, “Литература ааҕыыта” диэн кинигэ Россия саамай улахан быыстапкатыгар үрдүк наҕарааданы ылбыта.
Кырачаан ырыаһыттар, үҥкүүһүттэр тэрээһиҥҥэ мустубут дьоҥҥо бэйэлэрин эҕэрдэлэрин тиэртилэр. Арыылаах алаадьынан, сыалаах этинэн, бэл диэтэр, кус этинэн күндүлээтилэр.
Людмила ПОПОВА, “Саха сирэ” хаһыат, edersaas.ru
Ааптар хаартыскаҕа түһэриилэрэ.