Аан дойдуга хамсык саҕаланыаҕыттан Арассыыйа үрдүнэн 2,5 мөлүйүөн киһи (ааспыт хонукка 26 097 ыарыһах эбиллибит) ыалдьыбыт. Дойдуга барыта 44 159 киһи коронавирустан өлбүт (ааспыт сууккаҕа — 562 киһи). 1,98 мөлүйүөн ыалдьыбыт дьон пандемия саҕаланыаҕыттан үтүөрбүт.
Бу нэдиэлэ саҕаланыыта аан дойду үрдүнэн COVID-19 дьаҥынан ыалдьыбыт дьон ахсаана 25,87 мөлүйүөнтэн тахсыбыт. Ыарыы саҕаланыаҕыттан 1,52 мөлүйүөн киһи тыына быстыбыта биллибит.
Саамай элбэх ыалдьыбыт дьонноох дойду АХШ буолар, манна 14,7 мөлүйүөн киһи коронавируска сутуллубут. Иккис Индия — 9,6 мөлүйүөн киһи, үһүс Бразилия — 6,6 мөлүйүөнтэн тахса киһи. Төрдүс миэстэҕэ Арассыыйа — 2,5 мөлүйүөн киһи. Бэһис миэстэҕэ 2,34 мөлүйүөн сыстыбыт дьонноох Франция турар. 1 мөлүйүөнтэн тахса ыалдьыбыттаах дойдуларга Италия, Испания, Великобритания, Аргентина, Германия, Мексика, Польша, Иран уонна Колумбия киирэллэр. Бу биэтэккэ Перу, Украина уонна Турция чугаһаан тураллар.
«Саха сирэ» хаһыат, edersaas.ru