Култуура Маны аах

 “Аан дойду виртуоз-хомусчута” куонкуруска 82 саастаах хомусчут кэллэ

Бэс ыйын 16-17 күннэригэр Дьокуускайга ыытыллар “Аан дойду виртуоз-хомусчута” норуоттар икки ардыларынааҕы III куонкуруска 8 дойдуттан уонна Арассыыйа 11 эрэгийиэниттэн 39 бастыҥ толорооччу кыттыаҕа.

 

Кинилэртэн саамай саастаахтара, 82 саастаах Бизьяа Хуухэндуу Монголияттан Саха сиригэр хайыы үйэ иккис төгүлүн кэлэр.

Бизьяа Хуухэндуу  монгол варганыгар түөрт сааһыттан оонньуур. Бу куонкуруска монгол норуотун мелодияларын хомуска оонньуоҕа.

Кини: “Эдэр хомусчуттарга оонньуу национальнай ньымаларын үчүгэйдик үөрэтэргэ уонна куруук оонньуу сылдьарга сүбэлиибин”, — диэн  этэр.

Дьокуускайга баар Аан дойду норуоттарын хомуһун киинэ Монголияны кытары уруккуттан бииргэ үлэлиир. Улан-Баторга Киин уопсастыбаннай салаата баар. 2019 сыллаахха “Монголия хэл хуурун сөргүтэбит” диэн маастардар быыстапка-аахсыйалара буолбута. Онно  Саха сирин маастардара  18  үнүстүрүмүөнү биэрбиттэрэ.

Санатан эттэххэ, “Аан дойду виртуз-хомусчута” диэн хомуска оонньооччулар ортолоругар бэриллэр үрдүк аат икки куонкурус түмүгүнэн 18 толорооччуга бэриллибитэ.

Бу сырыыга бу үрдүк ааты ким ылыай? Куонкуруһу көрүөҕүҥ-истиэҕиҥ, сэргиэҕин. Сарсын, бэс ыйын 16 күнүгэр, 11 чаастан Орджоникидзе аатынан болуоссакка куонкуруска кэлбит ыалдьыттары көрүөххэ-истиэххэ, кинилэри кытары хомуска оонньуохха сөп.

Надежда ЕГОРОВА, «Саха сирэ», edersaas.ru

 

0
0
Telegram @edersaas20