Туймаада туонатыгар быйыл сайын улахан тэрээһин ыытыллаары турар – “Аан дойду виртуоз-хомусчута” норуоттар икки ардыларынааҕы III куонкурус. Тэрээһиҥҥэ уопсайа 40-тан тахса хомусчут кыттыаҕа.
Бэс ыйын 16-17 күннэригэр үһүс төгүлүн буолар виртуоз-хомусчуттар куонкурустарыгар 14 дойдуттан уонна Арассыыйа 11 эрэгийиэниттэн, уопсайа, 40-тан тахса киһи кыттыаҕа. Саха сирин аатын Эркин Алексеев, Артур Семенов, Варвара Степанова, Айсен Деллохов, Айаал Дмитриев, Туяра Жиркова, Арыйаана Михайлова, Нарияна Ренанто-Бочкарева уонна Георгий Слепцов көмүскүөхтэрэ.
Куонкурус кыттааччыта, Бүлүү улууһун Дьөккөн нэһилиэгин олохтооҕо Айаал Дмитриев:
— Бүлүү улууһа хомус уустарынан, хомусчуттарынан киэҥник биллэр улуус. Оҕо эрдэхпиттэн, 13-14 сааспыттан хомуска тардабын. Аан маҥнай Дьөккөн нэһилиэгин бочуоттаах олохтооҕо, СӨ маастара, дьоруой ийэ, тыыл бэтэрээнэ, эбэм Мария Ксенофонтовна Кондакова үөрэппитэ.
Оскуола кэнниттэн култуура кэллиэһигэр үөрэххэ киирэн баран Римма Романовна Жирковаҕа уһуйуллубутум.
Виртуоз-хомусчут – үрдүк аат. Ол эрээри, бу куонкуруска мин аат-суол туһугар буолбакка, саха хомуһун дьоҥҥо-сэргэҕэ тиэрдэр, хомус муускатын сайыннарар инниттэн кыттабын, — диэн санаатын үллэстэр.
Санатан эттэххэ, тоҕус кыайыылаахха түөскэ кэтиллэр үрүҥ көмүс бэлиэни, дьупулуому уонна 50 тыһ. солк. суумалаах харчынан бирииһи туттарыахтара.
Людмила ПОПОВА, “Саха сирэ” хаһыат, edersaas.ru