Култуура Сүрүн

“Аан дойду виртуоз-хомусчута” куонкурус кыайыылаахтарыгар туттарыллыахтаах бэлиэни билиһиннэрдилэр

Бу сыл бэс ыйын 16-17 күннэригэр Дьокуускай куоракка ыытыллыахтаах “Аан дойду виртуоз-хомусчута” норуоттар икки ардыларынааҕы куонкуруска виртуоз-хомусчут үрдүк аатын сүкпүт хомусчуттарга туттарыллыахтаах түөскэ кэтэрдиллэр бэлиэни сүрэхтээтилэр.

edersaas.ru

Бэлиэ тэрээһин лоп курдук Түмэл күнүгэр Аан дойдутааҕы хомус түмэлигэр ыытыллыбыта икки бүк үөрүүлээх.

Хомус аан дойдутааҕы түмэлин уонна киинин дириэктэрэ Дмитрий Бястинов:

— Бу бэлиэ 2011 сыллаахха ыытыллыбыт виртуоз-хомусчуттар куонкурустарыгар олохтоммута. Ол иннинэ, 1991 сыллаахха ыытыллыбыт бастакы тэрээһиҥҥэ, саҥа тэнийэн эрэр буолан, бэлиэ суоҕа. Биһиги түмэлбит пуондатыгар харалла сытар 2011 сыллааҕы бэлиэҕэ олоҕуран, быһыытын-таһаатын уларыппакка, биир халыыпка куттаран ыллыбыт.

Көстөрүн курдук, күн сардаҥатын курдук быһыылаах, цирконий тааһынан киэргэтиллибит, саха төрүт оһуора-мандара тулалаан эргийэ көтө сылдьар. Бэлиэ олоччу үрүҥ көмүһүнэн оҥоһулунна. От күөҕэ өҥү туһанныбыт.

Бу бэлиэни аан дойду хомуска тардыыга уһулуччу талааннаахтара кэтэллэр, — диэн бэлиэтээтэ.

Түмүккэ үһүс төгүлүн ыытыллар “Аан дойду виртуоз-хомусчута” куонкуруска Саха сирин аатыттан кыттыахтаах талааннаах хомусчуттар аар-саарга аатырбыт виртуоз-хомусчуттары Альбина Дегтяреваны, Юлияна Кривошапкинаны кытта сахалыы хомуска сыыйа тардыыны таһаардылар.

 

 

Людмила ПОПОВА, “Саха сирэ” хаһыат, edersaas.ru

0
0
Telegram Whatsapp