“Аан дойду виртуоз-хомусчута” куонкурус балаһыанньата уонна бырагыраамата бигэргэннэ
“Аан дойду виртуоз-хомусчута” норуоттар икки ардыларынааҕы III куонкурус балаһыанньата уонна бырагыраамата бигэргэннэ.
Тэрийэр кэмитиэт Дьокуускайга бэс ыйын 16-17 күннэригэр ыытыллыахтаах “Аан дойду виртуоз-хомусчута” норуоттар икки ардыларынааҕы III куонкурус балаһыанньатын уонна бырагырааматын бигэргэттэ.
Киэҥ далааһыннаах тэрээһиҥҥэ 14 дойдуттан уонна Арассыыйа 11 эрэгийиэниттэн виртуоз-хомусчут аатын ылар иһин 40-тан тахса хандьыдаат кыттыаҕа.
Саха сирин аатыттан былырыын күһүн сүүмэрдиир куонкуруһу ааспыт 9 хомусчут киириэҕэ.
Кыайыылаахтары норуоттар икки ардыларынааҕы дьүүллүүр сүбэ быһаарыаҕа. Кинилэр “Аан дойду виртуоз-хомусчута” үрдүк ааты сүгүөхтэрэ, дипломнары уонна үрүҥ көмүс мэтээллэри тутуохтара, ону тэҥэ, 50 000 солк. кээмэйдээх харчынан бирииһи ылыахтара.
Хомуһу тардыыга улуустар кыттыылаах флеш-моб куонкурус түмүктүүр тэрээһининэн буолуоҕа. Маны “Саха” НКИХ быһа көрдөрүөҕэ. Бэстибээл-куонкурус кыайыылаахтарын гала-кэнсиэрдэрэ П.А. Ойуунускай аатынан Саха академическай тыйаатырыгар бэс ыйын 17 күнүгэр буолуоҕа.
Бырагырааманан лиэксийэлэр уонна тас дойду виртуоз-хомусчуттарын маастар-кылаастара, “Дьокуускай – хомус дойдута” (“Якутск – мекка хомуса”) быыстапка, уо.д.а. атын тэрээһиннэр былааннаналлар.
Санатан эттэххэ, “Аан дойду виртуоз-хомусчута” норуоттар икки ардыларынааҕы хомуска (варгааҥҥа) тардааччыларын куонкуруһа бэйэтэ туспа устуоруйалаах. Дьокуускай куоракка 1991 уонна 2011 сыллардаахха Хомус муусукатын норуоттар икки ардыларынааҕы бэстибээл-кэнгириэстэрин кэмигэр буолбуттара.
Норуоттар икки ардыларынааҕы үһүс куонкурус РФ бэрэсидьиэнин гранынан өйөбүлүнэн ыытыллар. Тэрийээччилэр: СӨ Бырабыыталыстыбата, СӨ Култууратын уонна духуобунай сайдыытын министиэристибэтэ, Аан дойду норуоттарын хомуска түмэлэ уонна киинэ (Дьокуускай к.) уонна Варган норуоттар икки ардыларынааҕы уопсастыбата.
Аан дойду норуоттарын хомуска түмэлин уонна киинин пресс-сулууспата.