Хамсык содула уонна норуоттар икки ардыларыгар атыы ситимнэрэ урусхалланыылара ас-үөл уонна уоҕурдуу ырыынагын улаханнык айгыраппыттарын туһунан аан дойду саамай улахан тэрилтэлэрин салайааччылара иһитиннэрдилэр.
Аан дойдутааҕы баан салайааччыта Дэвид Малпас, ХНТ-га Ас-үөл уонна тыа хаһаайыстыбатын салаатын генеральнай дириэктэрэ Цюй Дунъюй, Норуоттар икки ардыларынааҕы валюта пуондатын (МВФ) баһылыга Кристалина Георгиева, Аан дойдутааҕы ас-үөл бырагырааматын (ВПП) толорооччу дириэктэрэ Дэвид Бисли уонна Аан дойдутааҕы эргиэн тэрилтэтин (ВТО) салайааччыта Нгози Оконджо-Ивеала холбоһуктаах анал биллэриини бииргэ таһаардылар.
Аан дойдутааҕы ас-үөл бырагыраамата (ВПП) биллэрэринэн, тугу даҕаны уларыппатахха, 82 дойдуга 345 мөлүйүөн киһи ас-үөл тиийбэт кыһалҕатын көрсүөхтэрин сөп. Аан дойду таһымнаах аймалҕантан сылтаан, 25 дойду аһы-үөлү кыраныысса таһыгар атыыга хааччахтааһыны олохтообут, бу — ас-үөл сыанатын үрдэппит. Уоҕурдуу сыаната Арассыыйаттан тахсыбат буолбутун кэннэ сыл иһигэр сыаната икки төгүл ыараабыт. Украинаҕа буола турар кириисистэн сылтаан, үөһэ ааттаммыт тэрилтэлэр салайааччылара туорах бурдук уонна уоҕурдуу эргиэнин сөргүтэргэ дипломатическай Сөбүлэһиини ылынарга ыҥырдылар.
Арассыыйа былааһа этэринэн, туорах бурдугу уонна уоҕурдууну атыылыыры утары быһаччы сааҥсыйалар суохтар эрээри, тустаах дуогабардары түһэрсиигэ үп эйгэтигэр хааччахтааһыннар бааллара атахтыыллар эбит. РФ Бэрэсидьиэнэ Владимир Путин арҕаа дойдулар сааҥсыйаларын көтүрэр түгэннэригэр, Арассыыйа тыа хаһаайыстыбатын бородууксуйатын атыыга таһаарыыта элбиэн сөптөөҕүн биллэрбитэ.
Хаартыска —https://agromage.com