“Саха сирэ” хаһыат кылаабынай эрэдээктэрэ, биллэр политолог Чокуур Гаврильев “Саха” НКИХ Арассыыйа уонна Украина икки ардынааҕы сыһыаныгар тус санаатын үллэһиннэ.
Политолог Чокуур Гаврильев: “Бастатан туран, эрэгийиэннээҕи улахан уонна аан дойдутааҕы уоттаах сэрии буолбатын өйдүөх тустаахпыт. Тоҕо диэтэххэ, НАТО да, Эмиэрикэ Холбоһуктаах штаттара даҕаны биһиги уоттаах сэриигэ кыттыахпыт уонна Украина диэки буолуохпут суоҕа диэн этэн тураллар. Ол гынан баран, кинилэр байыаннай өттүнэн балайда көмөлөспүттэрэ. Ол иһин, иккиһинэн, биһиэхэ кэлин суоһаабаттарын курдук, бу дьонтон сэриитин сэбин барытын былдьаан (холобур, Крымҥа эмиэ кэлин суоһуохтарын сөп), Украина эйэлээх буоларын туһугар операцияны (демилитаризация) ыытабыт, охсуһабыт. Үсүһүнэн, бу Украина норуотун кытта сэрии буолбатах, бу – националистары кытта сэрии. Дойду бэрэсидьиэнэ Владимир Путин итини бэлиэтээн аһарда”, — диэн санаатын үллэһиннэ.
Кини этэринэн, националистар былааска кэлиэхтэриттэн Донбасс олохтоохторун уһуннук эрэйдээбиттэр, хас даҕаны сылы быһа сэрии буолбут, оннооҕор кинилэр бэйэлэрин тылларынан кэпсэтэллэрин кытта көҥүллээбэттэр, федерализация буолуоҕун онно көҥүл биэрбэттэр диэн быһаарар.
“Украина НАТОҕа киирбэтин диэн биһиги дьоммут эрдэттэн эппиттэрэ уонна онно сөптөөх сыанабылы биэрбиттэрэ. Хомойуох иһин, Украина НАТОҕа киирээри хардыылыыр уонна “аан аттыгар кэтэһэн турар. Маныаха арҕааҥҥылар кинилэри үбүлүүллэр, өйүүллэр. Ол иһин Арассыыйа НАТО биһиги кыраныыссабытыгар ыга кэлиэ суохтаах диэн эттэ. Ол аата биһиги операциябыт, биир курдук, эйэни олохтооһун, иккис өттүнэн, бу дьону сэриилэрин сэбин алдьатан биһиэхэ суоһаабаттарын курдук дьаһаныы”, — диэн быһаарар.