Аан дойду үрдүнэн 200 мөлүйүөн киһи коронавируһу утары вакцинаны ылбыт
Аан дойду үрдүнэн 200 мөлүйүөнтэн тахса киһи коронавирустан быһыыны ылбыттарын туһунан ТАСС биллэрэр.
edersaas.ru
Көстөрүнэн улахан сыыппара эрээри, бу баара-суоҕа баар дьон ахсааныттан 2,6% буолар. Быһыыны ылбыт дьон үксэ АХШ, Кытай, Великобритания уонна Индия олохтоохторо. АХШ олохтоохторуттан 18,5% вакцинаҕа тиксибит (60 мөл.киһи), Кытайга быһыы үлэтэ бырыһыанынан аахтахха лаппа бытаан курдук — нэһилиэнньэ 3%. Ол эрээри ити 3 бырыһыаҥҥа 40 мөл. тахса киһи киирэр. Великобританияҕа араас тас территорияларын ааҕан 26,4% нэһилиэнньэтэ вакцинаны ылбыттар, бу 17,5 мөл киһи. Муҥутуур элбэх дьоно коронавирустан вакцина ылбыт дойдунан Израиль буолар — 80,3%!
Арассыыйаҕа олунньу 10 күнүгэр «Спутник V» вакцина маҥнайгы быһыытын 2,2 мөл. киһи ылбытын туһунан Гамалеи аатынан киин дириэктэрин солбуйааччы Денис Логунов кэпсээбитэ. Маны таһынан дойдубутугар өссө икки вакцинанан нэһилиэнньэни харыстыыр үлэ бара турар.
«Саха сирэ» хаһыат, edersaas.ru