Аан дойду Кубогар Турция оннугар Иран хамаандата кыттар буолла
Аны саас Америка Холбоһуктаах Штаттарыгар буолуохтаах көҥүл тустууга аан дойду Кубогар кыттыахтаах хамаандаларга уларыйыылар таҕыстылар. Ол курдук, бу улахан түһүлгэҕэ Турция оннугар Иран хамаандата кыттар буолла.
edersaas.ru
Санатар буоллахха, бу хамаанданан күрэхтэһиигэ аан дойду чөмпүйэнээтигэр аҕыс иһигэр киирбит дойдулар бөҕөстөрө кыттар бырааптаахтар. Былырыын Парижка ыытыллыбыт күрэхтэһии түмүгүнэн инники күөҥҥэ АХШ, Арассыыйа, Грузия, Турция, Азербайджан, Япония, Куба уонна Казахстан хамаандалара тахсыбыттара.
Оттон аан дойду Кубогар кэнники алта сылга хотторуу хомолтотун билэ илик Иран хамаандата тохсус миэстэ буолан, 2018 сыллааҕы аан дойду Кубогын көрө маппыт курдуга. Ол эрээри, куһаҕан үчүгэйэ суох буолбат дииллэриини, Ислам өрөспүүбүлүкэтин сүүмэрдэммит хамаандата быйылгы аан дойду Кубогар Турция оннугар кыттар буолла. Туроктар АХШ-ка ыытыллар аан дойду Кубогар туох биричиинэнэн кыттартан аккаастаммыттара билиҥҥитэ чопчу биллибэт.
Сурах хоту иһиттэххэ, туроктар дьахталлар ортолоругар ыытыллар аан дойду Кубогын эмиэ көтүтэр санаааахтар үһү. Оччотугар тохсус буолбут Швеция хамаандатыгар суол аһыллан биэриэх курдук. Арассыыйалар манна уон биирис миэстэлээхтэрэ.
Көҥүл тустууга аан дойду Кубога эр дьоҥҥо Айова-Сити куоракка (АХШ) муус устар 7-8 күннэригэр, оттон дьахталларга Такасаки куоракка (Япония) кулун тутар 17-18 күннэригэр ыытыллыахтара.
Роман Попов, «Саха сирэ» хаһыат, edersaas.ru