Бэс ыйын 15 күнүттэн Хива куоракка (Узбекистан) мас тардыһыыга аан дойду кубогар күрэхтэһии бастакы түһүмэҕэ саҕаланар.
Түһүлгэҕэ тоҕус дойдуттан 120 спортсмен кыттара күүтүллэр. Арассыыйа икки сүүмэрдэммит хамаандатыгар Саха сирин уон мадьыныта баар. Бу туһунан СИА иһитиннэрдэ.
Далааһыннаах улахан күрэхтэһиигэ кыттарга Арассыыйа сүүмэрдэммит хамаандатыгар Саха сириттэн Дмитрий Неустроев (60 кг), Виктор Крылов (70 кг), Петр Бурнашев (70 кг), Сергей Константинов (75 кг), Айсен Атастыров (80 кг), Станислав Иванов (80 кг), Павел Черноградскай (90 кг), Дмитрий Попов (105 кг), Наталья Черноградская (55 кг), Екатерина Белолюбская (65 кг) бааллар. Оттон хамаандалар 12 спортсменнара атын эрэгийиэннэртэн кытталлар.
Барыллааһынынан Афганистан, Венгрия, Иран, Казахстан, Кыргызстан, Пакистан, Арассыыйа, Таджикистан, Украина, Узбекистан спортсменнара далааһыннаах түһүлгэҕэ күөн көрсүөхтээхтэр. Маныаха күрэхтэһиигэ кыттааччылар вакцинацияламмыт буолуохтаахтар. Күөн күрэс бэс ыйын 20 күнүгэр диэри ыытыллар.
+1
+1
+1
+1
+1
+1
+1