Аан дойду чөмпүйэнээтин сэрэбиэйэ Саха сирин тустууктарын утарсааччыларын быһаарда
Аан дойду чөмпүйэнээтин сэрэбиэйэ ыытыллыбыт. Саха сирин тустууктара кимнээхтиин киирсиэхтэрэй?
Белградка аан дойдутааҕы көҥүл тустуу чөмпүйэнээтигэр кыттааччылар икки ардыларыгар сэрэбиэйдэстилэр, Саха сирин түөрт легионера кимниин киирсэллэрин биллилэр.
Күрэхтэһиилэргэ 57 киилэҕэ диэри Владимир Егоров, Георгий Окороков, 61 киилэҕэ диэри ыйааһыннаахтарга Николай Охлопков уонна Эдуард Григорьев тустуохтара, диэн СИА иһитиннэрэр. Чэпчэки ыйааһыҥҥа Саха сирин спортсменнара сетка үөһээ өттүгэр түбэстилэр. Ол курдук, Австралияттан кыттар Георгий Окороков бастакы киирсиигэ гватемалец Эдвин Сегураны кытта түбэстэ. Ситиһиилэннэҕинэ 1/8 финалга кинини АХШ бэрэстэбиитэлэ, аан дойду чөмпүйүөнэ Томас Гилман көбүөргэ көрсүөҕэ. Владимир Егоров бастакы эргииргэ Манвел Хндзрцяны кытта тургутуһуоҕа, тустууктар Европа ааспыттааҕы чөмпүйэнээтигэр тустубуттара, онно кыһыл көмүс мэтээли Саха сирин спортсмена иилиммитэ. Онно Егоров Армения бөҕөһүн баһыйбыта. 61 киилэҕэ диэри Эдуард Григорьев бастакы эргииргэ босхоломмута уонна киирсиитин 1/8 финалтан саҕалыаҕа. Кини утарсааччытынан АХШ-тан Сет Гроссы уонна Украинаттан Андрей Джелепы кытта киирсии кыайыылааҕа буолуоҕа.
Оттон Румынияттан киирсэр Николай Охлопков Пуэрто-Рико бэрэстэбиитэлэ Джосеф Силваны кытта күрэстэһиэҕэ. 57 киилэҕэ диэри ыйааһыннаахтар балаҕан ыйын 16 күнүгэр кыттыахтара, Москва бириэмэтинэн 11:30 ч. 61 киилэҕэ диэри ыйааһыннаахтар күөн көрсүһүүлэрэ балаҕан ыйын 17 күнүттэн саҕаланыаҕа.
СИА
Хаартыска: тустаах саайтан
Бэлэмнээтэ Женни Стрюкова