Аан дойду чөмпүйүөнэ Алена Дмитриева суруналыыстар ыйытыыларыгар хоруйдаата

Бу күннэргэ Нидерландыга (Голландия) түмүктэммит олорон эрэ волейболлааһыҥҥа аан дойду чөмпүйэнээтигэр Арассыыйа дьахталларга хамаандата бастакы миэстэни ылла. Александр Овсянников салайар хамаандата кыайыылааҕы быһаарар түмүк оонньууга АХШ волейболисткаларын 3-1 (18-25, 27-25, 26-24, 26-24) ахсаанынан баһыйа тутта.

edersaas.ru

Спорт устуоруйатыгар аан бастаан Татьяна Иванова, Ирина Смирнова, Юлия Медникова, Ирина Панина, Любовь Пермякова, Екатерина Окорокова, Елизавета Кунстман, Ольга Арбатская, Анна Годовицына,Яна Гриценко, Светалана Чуракова (бары Москваттан) уонна Алена Дмитриева (Саха Өрөспүүбүлүкэтэ) састааптаах Арассыыйа сүүмэрдэммит хамаандата параволейболга аан дойду чөмпүйүөнүнэн буолла. Бу иннинэ Арассыыйа дьахталларга хамаандата маннык күрэхтэһиигэ 2014 сыллаахха боруонса мэтээли ылан турар.

Параволейбол аан дойдутааҕы федерацията тэрийэн ыытар күрэхтэһиитигэр биһиги спортсменнарбыт кыһыл көмүс мэтээллэри уонна Кубогы сэргэ 2020 сылга Токиоҕа (Япония) ыытыллар к XVI Паралимпийскай оонньууларга кыттар быраабы ыллылар.

Бэҕэһээ “Триумф” Спорт киинигэр параволейболга аан дойду чөмпүйүөнэ Алена Дмитриева суруналыыстары кытта көрсүһүүтэ буолла. Пресс-кэмпириэнсийэни өрөспүүбүлүкэ спортка миниистирэ Георгий Балакшин иилээн-саҕалаан ыытта.

Күрэхтэһии туһунан сырдатарыгар, Алена чөмпүйэнээт Нидерланды биэс куоратынан — Арнем, Роттердам, Венло, Эйндховен уонна Гаага – барбытын эттэ. Бастаан бөлөхтөрүгэр Японияны 3-0 (25-15, 25-16, 25-15) кыайан баран, АХШ хамаандатыгар 0-3 (14-25, 16-25, 23-25) хотторбуттарын, салгыы Венгрияны 3-0 (25-15, 25-11, 25-8) баһыйа туппуттарын кэпсээтэ. Финал чиэппэригэр аан дойду 2016 сыллааҕы боруонса призерун Бразилияны (3:1), финал аҥарыгар Паралимпиада чөмпүйүөнэ Кытайы (3:0) самнарбыттар уонна түмүк оонньууга бу иннинэ хотторуу диэни билэ илик АХШ хамаандатын 3:0 ахсаанынан кыайбыттар.

Аан дойду чөмпүйүөнэ Саха Өрөспүүбүлүкэтин Спорка министиэристибэтигэр, спорт үрдүкү маастарыстыбатын оскуолатын кэлэктиибигэр, Сунтаар улууһун дьаһалтатыгар, инбэлииттэр Сунтаардааҕы уопсастыбаларыгар, спорт адаптивнай көрүҥнэригэр федерацияҕа, эрчиллэригэр усулуобуйаны тэрийбит, соҕуруу сбордарга барарыгар көмө-тирэх буолбут, киниэхэ эрэммит дьоҥҥо истиҥ махталын тиэртэ.

Арассыыйа Паралимпийскай кэмитиэтин регионнааҕы салаатын бэрэссэдээтэлэ, спорт адаптивнай көрүҥнэрин федерациятын сэбиэтин бэрэссэдээтэлэ Николай Дегтярев, Саха сирин волейболга федерациятын бэрэсидьиэнэ Василий Чичигинаров, өрөспүүбүлүкэтээҕи адаптивнай физическай култуура уонна спорт киинин волейболга тириэньэрэ Константин Гаврильев, киин куоракка олорор сунтаардар түмэр сүбэлэрин бэрэстэбиитэллэрэ, биир дойдулаахтара, оскуолаҕа үөрэппит учууталлара, волейболунан бииргэ дьарыктанар дьүөгэлэрэ, спорду сэҥээрээччилэр Аленаны аан дойду таһымнаах ситиһиитинэн, Сахатын сирин, төрөөбүт норуотун аатын үрдэппит кыайыытынан нөрүөн нөргүйэн туран эҕэрдэлээтилэр. Олоххо таптала, кыайыыга дьулуура барыбытыгар холобур буоларын ыйдылар, кыайыы кынаттанан Олимп чыпчаалын дабайарыгар, дьонун-сэргэтин алгыһынан холобур буолар хорсун олоҕу, кэпсээн буолар кэрэ кэскили айарыгар-тутарыгар, саҥа дьоһун ситиһиилэри баҕардылар.

Роман Попов

Ааптар хаартыскаҕа түһэриилэрэ.