Сэтинньи бүтүүтэ мас тардыһыыга аан дойду III чөмпүйэнээтигэр Саха Өрөспүүбүлүкэтин, Арассыыйа спордун маастара Евгений Удин чаҕылхайдык кыттан, 60 киилэҕэ чөмпүйүөн үрдүк аатын ылбыта.
edersaas.ru
Бу күннэргэ дойдутугар, Сулҕаччы нэһилиэгин Сэргэ-Бэс бөһүөлэгэр (Амма), Евгенийы чиэстээһин үрдүк таһымнаахтык барда. “Сулҕаччы нэһилиэгэ” МТ баһылыга Афанасий Ксенофонтов, Амма улууһун спортка кэмитиэтин начаалынньыга Эдуард Ефимов, нэһилиэк тэрилтэлэрэ, фермерскэй хаһаайыстыба салайааччылара, доҕотторо, аймахтара, бөһүөлэк олохтоохторо эҕэрдэлэрин, эдэр киһи сайыннын, дойдутун аатын ааттаттын диэн баҕа санааларын этэн туран, сыаналаах сэртипикээттэри туттардылар. Нэһилиэк дьаһалтата, бааһынай хаһаайыстыбалар убаһалары, Сутаковтар “Байдам” фермерскэй хаһаайыстыбалара оҕус борооскуну, доҕотторо Жирковтар дьиэ кэргэн хороҕор муостааҕы тэниттин диэн инникитин ынах буолар тыһаҕаһы бэлэхтээтилэр. Бөһүөлэк уус-уран самодеятельноһын кыттыылаахтара муусуканан эҕэрдэлэрин тиэртилэр.
Чөмпүйэнээт долгутуулаах түгэннэрин өссө төгүл көрөн, уолбут кыайыытынан киэн тутуннубут. Биир дойдулаахтара Мария Михайловна, Филипп Филиппович Удиннарга үтүө санаалаах, эйэҕэс майгылаах, туруоруммут сыалын ситиһэр дьулуурдаах оҕону ииппиттэригэр махтаннылар.
Евгений мас тардыһыытыгар уһуйбут бастакы тренердэригэр Альберт Сутаковка, Афанасий Владимировка, ХИФУ дьарыктыыр тренеригэр, старшай преподаватель Егор Кудриҥҥа махталын тириэртэ. Уолбутугар Евгенийгэ өссө үрдүк ситиһиилэри, чэгиэн доруобуйаны, дьолу-соргуну баҕарабыт.
Саргылаана ЕРИМЕЕВА,
Сэргэ-Бэс, Амма.