Аан дойдуга коронавируһу утары вакцинаны оҥорорго бөдөҥ фармацевтическэй хампаанньалар бары кэриэтэ үлэлииллэр. Соторутааҕыта AstraZeneca уонна Johnson&Johnson хампаанньалар чинчийиилэрин тохтото сылдьыбыттара. Манна тургутуу кэмигэр баҕа өттүнэн кыттааччылар ыалдьаннар, силиэстийэ ыытыллыбыта.
edersaas.ru
Оксфорд университетын кытта бииргэ чинчийиини ыытар AstraZeneca хампаанньа АХШ-ын иһигэр ыытар тургутуутугар кыттааччы ньиэрбэ сэдэх ыарыытынан ыалдьыбытыттан сылтаан балаҕан ыйыгар үлэтин тохтоппуа.
Америкаҕа ас уонна эмп санитарнай хонтуруолун ыытар уорган (FDA) хас да нэдиэлэ устата бу быһылааны үөрэтэн баран, ыарыы вакцинаны кытта сибээстээҕин кыайан дакаастаабатах. Онон тургутуу бу күннэртэн сөргүтүллүбүт. Вакцина үһүс түһүмэҕэр АХШ-ттан, Великобританияттан, Бразилияттан уонна Соҕуруу Африкаттан барыта 30 тыһыынча киһи кыттыаҕа.
Оттон Johnson&Johnson хампаанньа ыыппыт үлэтигэр вакцинаны ылбыт киһи биллибэт сибикилэрдээх ыарыынан ыалдьыбыт. Чинчийии түмүгэр бу ыарыы вакцинаны кытта сибээһэ суох диэн быһаарбыттар. Онон, үлэ салгыы барар.
Егор Карпов, «Саха сирэ» хаһыат, edersaas.ru