“Коронавирус утары вакцинаны сотору кэминэн оҥорон бардахпытына аан дойду нэһилиэнньэтин барытын 2024 сылга вакцинациялыахпытын сөп” — диэн киһини соччо үөрдүбэт билгэни Индиятааҕы сыворотка институтун дириэктэрэ Адар Пунавала биэрдэ.
edersaas.ru
Бу аан дойду үрдүнэн муҥутуур улахан вакциналары оҥоруунан дьарыктанар тэрилтэ. Кини этэринэн, үлэлиэхтээх вакциналар үгүстэрэ икки компонентан турар эмп курдук оҥоһуллаллара күүтүллэр, ол эбэтэр дьону барытын эмтииргэ 15 миллиард устуука препарат оҥоһуллан тахсыахтаах. “Итиччэ эми оҥорууга аан дойду эмп собуоттара хас да сыл үлэлээтэхтэринэ эрэ оҥорор кыахтаахтар” — диир Адар Пунавала.
Кырдьык, Арассыыйаҕа айыллыбыт “Спутник-V” вакцина икки фактордаах вирус вектора быһыытынан оҥоһулла сылдьар. Ол эбэтэр вакцинаны иккитэ төхтөрүйэн ыллахха толору иммунитет үөскүүр кыахтаах.
Егор Карпов, «Саха сирэ» хаһыат, edersaas.ru