Аан дойду 100 бастыҥ хаартыскатыгар саха фотограбын үлэтэ киирдэ
Аан дойду 100 бастыҥ хаартыскатын (35AWARDS-2017) ахсааныгар Саха сирин фотограба Михаил Черемкин үлэлэрэ киирдилэр. Бу норуоттар икки ардыларынааҕы улахан бириэмийэ 2015 сыллаахтан ыытыллар. Барыта холбоон 160-тан тахса дойдуттан 257 тыһ.тахса хаартыска киирбит. Бастыҥнары сыл устата дьон куоластаан, онтон дьүүллүүр сүбэ талан быһаараллар. Михаил бу куонкуруска Камчаткаҕа сылдьан эһэлэри түһэрбит хаартыскатын ыыппыт.
«Хаартыскаҕа түһэриинэн 2005 сыллаахтан дьарыктанабын. Ол сыл бастакы сиэним төрөөбүтүгэр кинини хаартыскаҕа түһэрээри «мыльница» фотоаппарат ылбытым. Онтон ыла айылҕаны, кыыллары, уулуссаны (street art) түһэрэр буолбутум. Элбэх куонкуруска кыттыбытым«, — диэн Михаил «Эдэр сааска» кэпсээтэ.
2010 с. — «Сыл бастыҥ фотограба» норуоттар икки ардыларынааҕы куонкурус лауреата.
2012 с. — «National Geographic” уонна «Global arctic awards” норуоттар икки ардыларынааҕы куонкурус лауреата.
2013 с. — Америка фотографтарын түмсүүтүн кыһыл көмүс мэтээлин ылбыта.
2015 с. — Москваҕа «Арктика» быыстапка кыттыылааҕа.
Саха сириттэн куонкуруска Урааҥхай, Надежда Иванова, Михаил Потапов, Марианна Троева, Алена Федорова, Галина Колдунова уо.д.а. кыттыбыттар.