Сунтаар улууһугар Леонид Попов аатынан Арыылаах орто оскуолатын 11-с кылааһын үөрэнээччилэрэ 18 саастарын туолан, дойду бэрэсидьиэнин талар быыбарга аан бастакытын куоластаатылар.
Кылаас барыта 10 үөрэнээччилээҕиттэн 8 оҕо сокуоннай сааһын туолбут. Онон сарсыарда 11 чаастан Сунтаар улууһун 525 №-дээх Арыылаахтааҕы быыбардыыр учаастагар үөрүүлээх тэрээһин буолан ааста. Кинилэргэ дойдубут инникитин талар быраап, үрдүк эппиэтинэс бэриллибитин туоһулуур өйдөбүнньүк бэлэхтэр туттарылыннылар. Быыбардыыр хамыыһыйа бэрэссэдээтэлэ Надежда Петрова, оскуола дириэктэрэ Лидия Никитина, кылаас салайааччыта Мария Григорьева, уо.д.а. оҕолору эҕэрдэлээтилэр уонна бэйэлэрин баҕа санааларын тиэртилэр.
Лев Иванов, Тимур Тихонов, Нарыйаана Никифорова, Мария Трофимова, Женя Мишаков, Герман Уаров, Гриша Семенов бүгүн аан бастаан бэйэлэрин куоластарын биэрэн, гражданскай иэстэрин толордулар.
Ангелина ВАСИЛЬЕВА, “Саха сирэ” хаһыат, edersaas.ru