Култуура

«Аалай-хамсык» аудио-кинигэ сүрэхтэннэ

Аан дойду аатырбыт суруйааччыта Джек Лондон нууччалыы «Алая чума» диэн тылбаастаммыт айымньытын суруйааччы, тылбаасчыт Афанасий Гуринов-Арчылан  сахалыы «Аалай хамсык» диэн тылбаастан, аудио-кинигэ буолан таҕыста. «Аалай хамсык» диэн тылбаастаммыт айымньыны аудио-испэктээк оҥоруу -– «Тэтим» араадьыйа уонна Смарт-бибилэтиэкэ холбоһуктаах үлэлэрэ.

Муус устар 28 күнүгэр аудио-кинигэ Смарт-бибилэтиэкэҕэ сүрэхтэниитигэр Афанасий Гуринов-Арчылан, дорҕоон режиссёра, «Тэтим» араадьыйа эрэдээктэрэ Иван Тарасов-Эрэл Эрэлик уонна композитор Егор Ефимов кытыннылар.
Тэрээһиҥҥэ кэлбит дьон аудио-кинигэни истэн ырыттылар, Джек Лондон олоҕун уонна айар үлэтин кытта билистилэр. ХИФУ бэрэпиэссэрэ, филология наукатын доктора Варвара Борисовна Окорокова тылбааска бэйэтин санаатын үллэһиннэ. Ону сэргэ, «Джек Лондон и его современники» диэн сүрүн бибилэтиэкэр Мария Беленкова бэлэмнээбит быыстапкатын сэҥээрдилэр.


 Афанасий Гуринов-Арчылан:
«Бу көрсүһүүгэ мин бэйэм Джек Лондон литератураҕа үлэтин уонна кини айымньыларын сахалыы тылбаастааһын туһунан олус элбэх саҥаны арыйдым. «Алая чума» сэһэни тылбаастааһын тус бэйэбэр олус  кэрэхсэбиллээх уонна умсугутуулаах буолла. Манна даҕатан эттэххэ, Джек Лондон айымньыта сахалыы аан бастаан
1948 сыллаахха тылбаастаммыт. Тылбаас эрэдээктэрэ -– филология наукатын хандьытаата, Аҕа дойду Улуу сэриитин кыттыылааҕа, Ньурба улууһуттан төрүттээх Никита Канаев. Ол кэнниттэн Джек Лондон айымньыларын тылбаастааһынынан Иннокентий Егоров, Софрон Данилов уонна Павел Неустроев дьарыктаммыттар. Смарт-бибилэтиэкэ үлэһиттэригэр аудио-кинигэттэн быһа тардыылары аан бастакынан истэр кыаҕы биэрбиттэригэр махтанабын. Бириэмэ биллибэккэ ааста. Эһигини, ааҕааччыларбын,  кытары көрсүһүү аныгыскы үлэҕэ түһүнэргэ көҕүлээтэ», -– диэн Арчылан  бэйэтин Телеграмыгар кэпсээтэ.
Аудио-кинигэ толору сүрэхтэниитэ ыам ыйын 2–6 күннэригэр 17:00 уонна 22:00 чаастан 107.1 FM долгуҥҥа «Тэтим» араадьыйа нөҥүө иһиллиэҕэ. Айымньыны Саха Өрөспүүбүлэкэтин үтүөлээх артыыһа Кирилл Семенов уонна «Тыыннаах Дорҕоон» биэрии ааптара Иван Тарасов-Эрэл Эрилик ааҕыахтара.

Надежда ЕГОРОВА, «Саха сирэ»  хаһыат, edersaas.ru

 

 

 

 

 

 

 

 

 

 

0
0
Telegram Whatsapp