“Саха Өрөспүүбүлүкэтин ойууру көрөөччүлэрин уопсастыбата” уопсастыбаннай тэрилтэ Экология, айылҕаны туһаныы уонна ойуур хаһаайыстыбатын министиэристибэтин өйөбүлүнэн, от ыйын 23 күнүттэн «Аал Луук Мас» арт-эбийиэк бастыҥ бырайыагын куонкуруһун биллэрдэ.
Куонкурус Саха сиригэр Ойуур хаһаайыстыбата тэриллибитэ 80 сылыгар ананар, итиэннэ мас пааматынньыгын («Аал Луук Мас» арт-эбийиэк) уобараһын арыйар бастыҥ бырайыагы быһаарар сыаллаах тэриллэр. Пааматынньык эскииһин бырайыага архитектура көрдөбүлүгэр сөп түбэһиннэрэн, кээмэйин, туох матырыйаалынан оҥоһулларын ыйан, итиэннэ тиэйэн аҕалар, таҥан туруорар ороскуотун киллэрэн туран оҥорор ирдэнэр.
Бастатан туран, «Аал Луук Мас» арт-эбийиэк кээмэйинэн, итиэннэ тас көрүҥүнэн туруоруллар сирин-уотун уопсай көстүүтүгэр сөп түбэһиэхтээх.
Иккиһинэн, мас матырыйаалларынан оҥоһуллуохтаах.
Үсүһүнэн, арт-эбийиэк бырайыага 1,0 м х 1,0 м кээмэйдээх кытаанах планшекка оҥоһуллубут, модела, (форэскиһэ) М 1:10 сымнаҕас матырыйаалга түһэриллибит, ис хоһоонун быһаарар суруктаах-бичиктээх, итиэннэ тиэйэн аҕалар, таҥан туруорар ороскуота толору ыйыллыбыт буолуохтаах.
Бу куонкуруска биирдиилээн даҕаны, кэлэктиибинэн даҕаны кыттыахха сөп. Сайаапкалар уонна бырайыактар 2019 сыл атырдьах ыйын 31 күнүгэр диэри, “Саха Өрөспүүбүлүкэтин ойууру көрөөччүлэрин уопсастыбата” уопсастыбаннай тэрилтэҕэ, маннык аадырыска: Дьокуускай к., Дежнев уулусса 73 №-игэр тиксэрилэр биитэр электроннай почтанан: ozl-sakha@mail.ru “Куонкуруска” диэн бэлиэлээх туттарыллаллар. Сиһилии 32-02-01 төлөпүөнүнэн билсиҥ.
Дьүүллүүр сүбэ үлэлэри сыаналыырыгар мас уобараһа төһө толорутук арыйыллыбытын, композиция уратытын, итиэннэ пааматынньык бырайыага туруоруллар сиригэр-уотугар төһө барсарын, көрөөччүгэ хайдах ылынылларын учуоттуур. Кыайбыт бырайыактаах ааптар дипломунан бэлиэтэнэр, итиэннэ «Аал Луук Мас» арт-эбийиэги оҥорор быраабы ылар. Пааматынньык («Аал Луук Мас» арт-эбийиэк) Дьокуускайга, Култуура уонна сынньалаҥ пааркатыгар баар “Ойууру көрөөччү” сквергэ туруоруллуоҕа.
Раиса Сибирякова, «Саха сирэ» хаһыат, edersaas.ru